OM ta conclui caso penal contra ambtenaar di Departamento di Enseñansa cu multa y servicio na comunidad

Bao guia di Fiscal di Husticia, Landsrecherche a haci investigacion penal di casonan di posible soborno administrative pasivo y falsificacion pa cu e examen Hulandes p’e asina yama “naturalisatietoets” pa aña 2012.

Stranheronan cu ta desea di haya nacionalidad Hulandes, mester haal e naturalisatietoets aki.

E tets ta wordo haci y examina pa e Examenbureau di Departamento di Enseñansa di Aruba, cu ta cay bao Ministerio di Enseñansa di Aruba.

E ta consisti di varios parti, bao di cual un testnan obligatorio di Hulandes.

 

E investigacion di Landsrecherche a mustra cu un ambtenaar cu (anteriormente) tabata traha na Examenbureau, sr. M.L.C., a pidi y a ricibi regalonan (monetario) di participantenan na e test di idioma, en cambio p’e falsifica nan resultadonan di examen.

E investigacion a mustra alavez cu M.L.C. tabatin probecho ilegal for di e hechonan castigable aki.

 

Sr. M.L.C. a wordo kita di trabao. Tambe a resulta cu departamento di Enseñansa di Aruba a tuma medidanan pa evita e tipo di fraude aki den futuro mas tanto posible.

For di e investigacion no a resulta, cu e fraude cu a keda constata, lo a hiba na stranheronan cu a haya nacionalidad Hulandes inhustamente.

 

Tur esaki, y tambe e tamaño limita di e fraude, a pone cu Ministerio Publico di Aruba a dicidi pa resolve e caso penal pafo di Corte.

A palabra cu sr. M.L.C. ta cumpli cu 120 ora di servicio na comunidad, cu e ta paga un boet di 22.500 florin y cu e ta paga bek e suma obteni ilegalmente di 22.500 florin.

 

A palabra, ademas, cu e ta acepta su ontslag for di trabao y cu e no ta bay aspira pa claim ningun tipo di daño. Mientrastanto señor M.L.C. a cumpli cu su servicio na comunidad y e boet a wordo paga.

Leave a Reply

Top