Opinion personal tocante – Partidonan pro Matrimonio di Mesun Sexo

Skirbi pa: Omaira Britten

 

Un feliz mainta pueblo di Aruba. Prome cu tur cos ban gradici Dios cu nos por a habri nos wowonan awe mainta. Ban ta mas cuidadoso y respeta otro manera Hesus a siña nos unda den e ley di Dios su mandamento ta poni: STIMA BO PROHIMO MANERA BO MES.

Stop di calumia otro, ofende otro sin mester en bes di haci oracion pa Dios guia nos isla p’e proximo eleccion unda bo voto ta importante como unico doño di Aruba pa scoge e gobernantenan cu tin di dirigi nos isla poniendo Dios na prome lugar.

 

Ayera mi a scucha e debate cu preguntanan lansa hopi bon y ta algun bon contesta te momento cu e pregunta clave “Si” of “No” a bin dilanti unda a puntra cua partido ta pro MATRIMONIO DI MESUN SEXO.

Aki Dios a permiti pa desenmascara tur esnan cu a bisa “SI” cu a bende TATA TODOPODEROSO manera fariseonan pa gana voto y poder.

Esakinan ta yama nan mes Cristian-Democratico? Asina Hesus a wordo crucifica pa Hudas pa placa, placa, placa, poder, poder, poder.

 

Pueblo di Dios boso lo kier vota pa un partido Anti-Cristian. Boso kier mira e furia di Dios manera a sosode cu Sodoma y Gomora? Ami tin tres yiu hoben y un nieto y mi no ta desea pa nan pasa den e furia di Dios.

Habri boso wowonan y mira ken boso kier pa representa boso como doño di Aruba pa un miho futuro cu un meta pone boso como pueblo na prome luga guia pa Dios y su unico yiu Hesus cu a bin na mundo pa salba nos.

No keda sin bay vota! E ta un derecho di tur ciudadano cu stima nan pais y ta desea di mira nan pais progresa.

 

Awo t’e oportunidad di tuma boso decision dia 22 di september 2017. Vota pa wordo guia pa Dios of vota pa wordo trapa p’e enemigo cu lo bin pa destrui y mata?

Pensa bon, bay na rudia y pidi Dios SALBA NOS ISLA DI WORDO CASTIGA.

Cada suplica di e pueblo di Dios lo wordo scucha, pasobra e ta un Tata Fiel. Esnan cu vota contra Dios mayan no yora malay y culpa Dios p’e castigo ricibi manera e pueblo di Israel a warda 40 aña pa drenta e tera prometi pa nan mesun culpa desobedeciendo Tata Celestial.

Mi no ta un fanatico simplemente mi ta un yiu cu ta obedece su Tata mescos cu mi a obedece mi tata terenal.

Mi ultimo palabra ta: Esun cu tin orea, tende, y esnan cu tin wowo, mira, y si bo tuma un mal decision, biba cu e culpa y tur loke bin su tras.

 

Pueblo di Dios, hobennan lanta riba y scucha bos di boso tata vota consciente no pa material cu lo caba pero pa un miho futuro pa boso yiunan por disfruta di boso bon.

Ban uni den oracion y pidi Dios sigui guia nos pais Aruba. No sea fariseo bay misa tur diadomingo, tuma Santa Hostia, cana Caminda di Cruz tur Diabierna Santo y por ultimo traiciona bo tata, bo isla Aruba futuro di bo yiunan.

Lesa den bijbel unda dios a papia bon cla: 1 Corintios 6:18 Dios bendiciona E pueblo di Aruba.

Top