Oportunidadnan comercial pa atrae negoshi Europeo den e region Americano ta grandi y amplio

Despues di e conferencia di paisnan LGO cu ta cay bou di e organisacion Association of Overseas Countries and Territories, OCTA, di Union Europeo, por mira atras riba encuentronan fructifero unda e rol lider di Aruba, bou guia di Prome Minister Mike Eman, a resalta.

 

Cedrick Tilma, kende ta representante di Aruba na Union Europeo, a bisa cu den e proposicion cu Aruba a duna n’e islanan LGO, riba e posicion cu mester tuma despues di 2020 ora cu Inglatera no ta forma parti mas di Union Europeo, ta papia di e balor agrega cu e islanan LGO mester tin pa Europa.

 

E reunion aki a tuma lugar siman pasa y a trata pregunta manera: Tin sentido p’e relacion di OCT cu UE ta basa principalmente riba ayudo pa desaroyo, of ta tempo pa un relacion mas fuerte y madura; e partnership aki mester sigui wordo financia via di Fondo di Desaroyo Europeo of tin un forma mas inteligente pa haci esaki, kisas via di e presupuesto regular di UE.

E balor agrega cu e islanan, p.e. den Caribe, tin pa Europa ta grandi.

Nan ta ubica serca di Continente Americano, cu ta haci nan importante pa comerciantenan Europeo cu kier un laso nobo cu socionan den e area aki, cu mercadonan grandi.

 

“Pues tin oportunidad pa negoshi for di Europa, uzando Aruba como hub. Tur esaki a wordo discuti siman pasa,” Cedrick Tilma a splica.

Aruba tambe a inspira hopi di e islanan cu e maneho di energia cu e ta ehecutando, unda cu kier logra pa ta totalmente independiente di sistema convencional den e produccion coriente.

Tabatin diferente delegacion cu a bishita WEB, planta solar na Aeropuerto y parke di molina.

 

“Pa nos huespednan cu a bin for di rond mundo, e bishita tabata algo cu nan por a siña for di dje. Y pa nos tabata un placer pa comparti nos experencianan,” e representante di Aruba na Brussels, Cedrick Tilma a bisa.

 

 

Top