Ora cu no tin argumentonan pa usa contra Gobierno, Ta recuri na dolornan aheno pa probecho politico Di acuerdo cu Marlon Sneek

Parlmentario sr. Marlon Sneek ta haya masha lamentabel mes con politiconan opositor ta haci politica cu dolornan aheno di cuidadanonan cu a haya nan den e experencia amargo di atraco.

E politiconan aki ta haci comosifuera ta den e ultimo lunanan so Aruba a conoce atraco.

Shonnan, atraco semper tabata existi riba e isla aki y na unda hasta den pasado na unda cu atraconan a culmina den asesinato di cuidadanonan na pia di nan trabao.

Acaso e tempo ey a exigi cabez di Minister di Husticia e tempo ey??

 

Criminalidad ta existi na tur parti di mundo y sigur Aruba no ta un excepcion pa cu e fenomeno lamentabel aki.

Parlamentario Marlon Sneek no kier bay en detayes riba e atraconan di pasado aki mirando cu esaki ta habri heridanan di esnan cu a perde un ser keri debi na un atraco cu a culmina den un asesinato.

Pero awe bo ta haya politiconan opositor ta manera roga pa atraco tuma lugar p’ asina nan por tin argumento y issuenan pa sobrevivencia di nan mes como politiconan.

 

Tambe por constata un Parlamentario di MEP insinua cu nada no ta wordo haci contra criminalidad y cu mester duna MEP oportunidad pa calma e ola di criminalidad cu ta azotando nos isla.

Esaki Parlamentario Marlon Sneek ta haya un insulto directamente den direccion di nos Cuerpo Policial cu ta haciendo un bon trabao y atrobe pueblo por constata cu un cantidad di e malhechornan aki a keda deteni recientemente.

 

Acaso e politico aki di MEP ta perde haya y lubida con Gobierno di MEP durante nan periodo a campaña cu e lema Ordo y Prosperidad??

E ordo cu a wordo implementa ta ora cu Ministernan di e tempo ey a arma casi tur nan bodyguardnan y e prosperidad cu tabatin tabata pa nan friends and family y pueblo mes a wordo lubida.

Nos Cuerpo Policial tabata centro di insulto serca e propio Minister President e tempo ey cu a cataloganan como padvinders. Y asina por continua.

 

Si tin un Gobierno cu no tabatin respet pa nos Cuerpo Policial t’e Gobierno di MEP. Continuando Parlamentario Marlon Sneek sa cu sigur no lo por evita pa elimina criminalidad por completo riba nos isla, pero si ta constata e bon trabao cu ta wordo eherci pa nos Cuerpo Policial pa soluciona e atraconan cometi.

E Gobierno aki a percura pa haci cambionan necesario den nos codigo penal na unda a aumenta e castigo pa cu e delitonan aki.

 

Awor ta tuma nota tambe di un politico, ex Minister ta insinua cu ora nan bin den Gobierno lo aumenta e castigo pa cu e delitonan aki. Ta ken e kier tuma haci, pasobra e sa bon cu ya e castigonan pa cu e delitonan manera atraco a wordo hisa caba algun aña pasa y na unda e mes tabata forma parti di e Gobierno aki.

Terminando Parlamentario Sneek kier a remarca cu sigur ta un berguensa pa wak con politiconan opositor ta manera samuronan wardando y deseando pa un atraco pasa p’asina bin den publicidad y asina por saca nan sed di venganza y frustacion.

 

 

Top