Orden di Abogadonan di Aruba ta elabora riba E importancia di pone bo asuntonan legal den man di un abogado legitimo

Despues di a tuma nota di e sucedidonan recien encuanto individuonan cu ta wordo sospecha di tabata comete estafa haciendo nan mes pasa como abogado, Orden di Abogadonan di Aruba, cumpliendo cu su meta di e. o. conserva asistencia legal adecua, a haya prudente pa elabora un poco rib’e importancia di pone bo asuntonan legal den man di un abogado legitimo.

 

Posesion di un titulo universitario di ley (mr of llm) ta un di e rekisitonan principal pa por wordo admiti dor di Corte Comun di Husticia como abogado, mas esaki riba su mes no ta suficiente.

 

Pa por wordo admiti como abogado un persona cu e titulo ariba menciona mester presenta un cantidad di documento dilanti Corte Comun di Husticia, manera e. o. un declaracion di conducta duna dor di Ministerio Publico, p’asina verifica cu e persona aki ta di comportacion impecable.

Adicionalmente tanto Procurador General como tambe Orden di Abogadonan di Aruba mester duna di conoce na Corte Comun di Husticia di no tin ningun objeccion contra nombramento di e candidato en cuestion como abogado.

 

Unavez tur rekisito wordo cumpli cu ne, Corte Comun di Husticia ta planifica un audiencia den cual ta bay over na huramentacion di e candidato. Akinan e ta hura na Dios (of priminti den caso di no ta religioso) di lo eherce su trabao como abogado na honor y consciencia.

 

Banda di esaki, un abogado tin cu eherce su ofishi bou di guia di un patron – kende mester ta un abogado cu amplio experiencia – durante e prome 3 aña di su carera. E patron tin e tarea di guia e abogado principiante p’asina e siña conoce y haya experiencia den tur aspecto di abogacia.

 

Ademas tur abogado tin e obligacion di tene nan mes na e Ordenansa di Abogacia (Advocatenlandsverordening) y ta cay bou di e supervision di e Conseho di Supervision di

Abogacia (Raad van Toezicht). E conseho aki, cu ta consisti di tanto Hues como abogado, ta controla si un abogado ta atene su mes na e Reglanan di Conducta y ta atende tambe cu eventual kehonan cu por tin rib’e forma riba cual nan ta brinda nan servicio.

 

Manera ta obvio for di lo antes menciona, un abogado ta mucho mas cu un hende cu conocemento di ley. Ta trata di un persona cu ta pasa dor di un escrutinio continuo y preparacion extenso p’asina garantisa cu bo asuntonan legal ta wordo atendi di un forma diligente y responsabel.

 

Pa verifica cu un abogado ta legitimo bo por acudi libremente na e website di Orden di Abogadonan di Aruba, www.ova.aw, unda cu bo lo haya un lista di tur abogado cu actualmente ta admiti dor di Corte Comun di Husticia pa eherce e profesion di abogado, como tambe informacion tocante diferente otro aspecto di importancia riba tereno legal.

 

Top