Organisa pa Michella Lacle; Book Drive cu meta di duna bukinan un cas nobo

Michella Lacle, candidata riba lista di partido POR lo ta organisando un Book Drive riba diadomingo 17 di september. E Book Drive lo cuminsa na Centro Pavia di 11’or di mainta te cu 4’or di atardi. Lo bay bin tin bendemento di BBQ tambe e dia aki.

E meta principal di e book drive ta pa recauda bukinan cu no ta wordo uza mas pero cu ta den bon condicion y duna nan un cas nobo. E bukinan lo wordo categorisa p’asina wordo entrega na algun organisacionnan den nos comunidad. E organisacionnan lo ta e. o. Korrektie Instituut Aruba, Scol di Ofishi St. Cruz y tambe Scol di Ofishi Savaneta.

Stimula lesamento
E idea ta cu amigonan por cera un grupo, yena cahanan cu bukinan for di diferente destinacion den comunidad di Aruba y entrega e cahanan na Centro Pavia. Esaki ta un manera di no solamente yuda, pero tambe comparti cu otro. Esunnan interesa pa participa na e evento aki por contacta Diana Croes na +2977305616. Asina aki tur hende ta duna di nan parti pa stimula lesamento den nos comunidad.

Lesamento ta algo esencial pa desaroyo humano. No solamente e ta yuda expande imaginacion pero tambe e ta yuda hende bira mas comprensivo sin importa e edad di e lesado. Studionan scientifico ta argumenta cu lesa ta un bon arma pa combati soledad.

Top