Organisadornan hopi contento cu participacion di organisacionnan local den evento pa yuda Aruba cumpli cu metanan mundial

Jocelyne Croes di comision organisador di “United Nations Sustainable Development Goals Planning Mission”, ta hopi satisfecho con e evento ta bayendo.

Participantenan di organisacionnan local a yuda crea un ‘roadmap’ p’asina Aruba por yega n’e Metanan Mundial pa un Desaroyo Sostenibel (SDG’s) mas liher y efectivamente cu ta posibel, cu accionnan realistico y inovativo.

 

Jocelyne Croes, Presidente di e Comision Nacional pa Metanan Mundial di Nacionnan Uni, a splica cu pa casi un aña nan a bin ta trahando di serca cu Nacionnan Uni pa mira con e organisacion mundial por yuda Aruba implementa e SDG-nan (Sustainable Development Goals di UN).

“E ta duna nos e oportunidad pa mira con nos por eleva mas ainda e desaroyo sostenibel na Aruba, crea un pensamento cu ta cuadra cu sostenibilidad, y ki actividad y programanan ta bay bini cune.”

E participacion di UN ta pa yuda Gobierno di Aruba crea e mapa pa Aruba cana y yega n’e 17 metanan acepta pa nacionnan mundialmente.

 

Ta studia durante e siman di reunion aki cua t’e areanan cu mester mehora pa cumpli cu e metanan mundial pa 2030.

Pa cumpli cu esaki tabata importante cu organisacionnan local, gubernamental y no-gubernamental (NGO’s), participa y yuda crea e MAPA di Aruba.

“Nos tin bon participacion di localnan. Nos a invita sector priva, NGO-nan y departamentonan di Gobierno. Nan a participa hopi bon y a duna bon contribucion te cu awor riba locual nan ta haya cu por yuda Aruba yega na un forma di traha mas sostenibel.”

 

Na mesun momento sra. Jocelyne Croes a informa cu e sesion cu mester a tuma lugar ayera nochi a wordo cambia p’awe diabierna, di 9 or pa 11 or di mainta na Renaissance Convention Center.

E sesion di diaranson a wordo parti den grupo di discusion riba temanan manera: Economia, social y medio ambiente.

E grupo cu a trata sector social sostenibel tabata esun cu a haya mas acogida.

Por a nota presencia tambe di Parlamentarionan Donny Rasmijn, Chris Dammers, Lorna Varlack, y Jennifer Arends-Reyes.

 

E delegacion di Nacionnan Uni, cu ta consisti di 6 persona ta encabesa pa Marcel Alers, un experto den energia alternativo, kende a splica cu nan presencia ta pa yuda Aruba den implementacion di e agenda SDG na Aruba.

Aruba, el a bisa, a haci un compromiso pa cumpli cu e meta den e periodo acorda, esta pa 2030. E dia di diaranzon tabata uno durante cual a tene consulta cu stakeholdernan di e comunidad local.

Pa loke t’e sesion di consulta, el a bisa cu tur e gruponan cu nan ta haya necesario pa ta presente pa duna un contribucion, a forma parti di e reunionnan.

E reaccion di e organisacionnan local el a haya cu tabata hopi positivo, cu hopi interaccion, cu sosten di e expertonan di Nacionnan Uni.

Leave a Reply

Top