Ostrick Jansen, Huez a sentenci’e na 18 luna di prison

Algun siman pasa Fiscal di Ministerio Publico a exigi un castigo di 1 aña y mey di prison p’e conocido locutor di Power FM y MC na eventonan, esta Ostrick Jansen (MC Oz) di 31 aña di edad, acusa di a tene relacion sexual cu un mucha muher di 14 aña, esta menor di esaki, sak’e na estado y despues core pa su responsabilidad.

 

Di e 18 lunanan di castigo, 6 luna ta condicional, pues lo mester sinta solamente 12 luna di prison.

Huez sinembargo a tuma un decision diferente n’e demanda y a condena e locutor di radio awe na 18 luna completo, sin kita 6 luna condicional, solamente ta kita e 4 lunanan cu el a pasa den detencion preventivo.

 

Tabata diaranson dia 7 di december 2016, Recherchenan di Jeugd en Zeden Politie a detene e sospechoso, kende desde un principio tabatin abogado mr. Chris Lejuez den su defensa.

E abogado a bisa den Corte cu MC Oz no tabata sa cu e mucha muher tabatin solamente 14 aña. Sinembargo Fiscal a aclaria cu di acuerdo cu ley y hurisprudencia den casonan similar, a deduci cu no ta haci diferencia cu si e sospechoso sa of no e edad di e vicitma.

Huez a bisa den Corte: “Andere mensen moeten nadenken voordat ze zoiets doen”.

 

Na Polis MC Oz a duna declaracionnan contradictorio riba e tema aki, di cu si e tabata sa cu e mucha muher ta menor di edad of no.

E victima a sigura na Polis cu el a bisa MC Oz su edad prome cu a tene relacion sexual. Y cu si e relacion sexual tabata consenti of no, tampoco ta haci ningun diferencia den ley.

Tene relacion sexual cu un mucha bou 16 aña ta castigabel pa ley y punto!

 

Fiscal a lamenta masha e actitud di MC Oz, cu a sabiendas cu e ta teniendo relacion cu un mucha, a haci’e sin proteccion, a sak’e na estado y core pa su responsabilidad tambe!

E acusado tin dos siman pa apela e sentencia, den caso cu e no ta di acuerdo cu su castigo.

Top