Otmar Oduber a gradici tur comisario di companianan estatal cu tabata resorta bou di dje Profesionalnan cu a haci un tremendo trabou na tur 4 compania

Durante conferencia di prensa di Plataforma Politico POR, Otmar Oduber a gradici tur profesional, persona cu a fungi como comisario di diferente compania estatal di pais Aruba.

Oduber a menciona cu siman pasa Gobierno a dicidi di retira practicamente tur comisario di NV-nan cu tabata cay bou su responsabilidad, esta Arubus, ANSA y ATA SG.

 

E personanan aki a wordo nombra a base di nan experticio, di nan conocemento y e confiansa cu Gobierno a deposita den nan persona.

Practicamente tur e nombramentonan aki a tuma lugar hunto cu Secretaria di Conseho di Minister y Conseho di Minister automaticamente ta na altura di tur nombramento.

Mirando esaki tog tabata un sorpresa cu 6 luna prome cu un eleccion a tuma e decision di retira personanan cu e propio Gobierno y no solamente Oduber como Minister a nombra/aproba y algun di nan pa un termino basta largo caba.

 

Repasando e NV-nan, Otmar Oduber a indica cu ANSA, cual t’esun mas recien ta uno sumamente exitoso unda cu e Hunta Comisario a haci e trabou debido pa por tin un compania hoben cu a sa di genera ganashi unda cu despues di mas di 27 aña por a adkiri un surveillance system, un radar pa control di trafico aereo na Aruba.

E radar aki ta den proceso di instalacion hunto cu SETAR y e compania internacional cu ta pone sitenan tur rond di Aruba.

Ta trata di un inversion cu ta posibel dor cu a privatiza e entidad aki.

Straño ta cu e unico persona di e comisariado di ANSA cu no a haya retiro t’e persona cu ta trahando cu e actual Minister n’e momentonan aki .

 

Pa loke ta ATA SG, Otmar Oduber a bisa cu e instancia aki a prueba su mes. Den 5 aña y mey di existencia no solamente e ta hopi exitoso.

Raportnan internacional como local ta mustra cu den ultimo 6 aña Aruba e crecemento economico a depende practicamente 100% riba e crecemento den turismo.

Tambe a genera mas di 34 miyon florin di entrada extra pa caha di Gobierno. Esaki ta un refleho tambe di e gran trabou cu e comisarionan a haci den ATA SG.

 

Papiando di AAA, Otmar Oduber a bisa cu aki no por a mishi cu e comisarionan mirando cu tin un convenio cu Schiphol.

Aki tambe Otmar Oduber a gradici nan p’e trabou cu nan ta realizando unda a hasta finaliza un prestamo miyonario cu a tuma lugar den añanan 90 y cu ta produci awe un entrada adicional di 8-9 miyon florin pa aña pa Gobierno, fuera di tin un Aeropuerto sumamente exitoso.

 

Otmar Oduber a gradici tur e comisarionan cu a duna nan tempo pa haci un tremendo trabou pa pais Aruba y ta spera cu e paso cu Gobierno a tuma 6 luna prome cu eleccion no lo ta pa pone man riba e placa cu tin den e NV-nan.

Miembro di POR a bisa cu e ta spera cu Gobierno coregi loke a tuma lugar cu ATA cu ta wordo regi pa leynan cu ta stipula con ta nombra y con ta retira comisarionan y e forma cu e retiro aki a tuma lugar ta un forma ilegal.

Nombramento di tanto Presidente di e Hunta di ATA como tambe e miembronan cu ta wordo nomina pa AHATA pa ley mester tuma lugar riba conseho di e hunta, pero den e caso aki Gobierno a bay over na simplemente retira

 

Finalizando Otmar Oduber a declara cu tur pregunta cu por tin riba e departamentonan por wordo busca na cada instancia y 3 di e 4 NVnan aki ta sumamente exitoso y tur 4 ta wordo maneha n’e mihor forma cu ta posibel, cual ta wordo mira atrabes di e diferente raportnan anual cu tur ta bay pa Parlamento y CAD tambe, contrario na otro companianan estatal.

 

“Un biaha mas, masha masha danki na tur e profesionalnan cu a dedica nan tempo n’e companianan aki”.

Top