Otmar Oduber di E Forsa Nobo: Dunamento tereno di cas y comercial mester ta transparente y lo ta bek central na e departamento concerni despues di september

Otmar Oduber di e plataforma politico POR a expresa cu dunamento di tereno di cas y tereno comercial mester ta transparente y lo ta bek central na e departamento concerni despues di september ora cu POR drenta gobernacion.

 

Durante conferencia di prensa di E Forsa Nobo, Otmar Oduber a bisa claramente cu despues cu siman pasa a atende e tema di dunamento di tereno, a haya un avalancha di yamadanan di disgusto pa loke ta e maneho cu ta wordo hiba na Aruba.

 

Pa loke ta otorgamento di tereno pa cas ta calcula cu miles y miles di peticion a wordo firma dor di e Minister actual di Infrastructura y lamentablemente e hendenan no ta hayando e tereno siendo cu ta bayendo pa 3,4 of 5 aña cu a firma.

E Minister ta pone riba e papel akkoord conform, cual e Minister mes a bisa cu no ta un akkoord pa e ciudadano haya un tereno, pero cu ta un akkoord pa e departamento cuminsa traha rib’e posibilidad pa un persona haya tereno den nos comunidad.

 

“E ta un disgusto enorme den nos comunidad, pero mas cu tur ta cu nos ta bisa cu e epoca di PPK kaart a wordo elimina cu AZV, pero e Minister di Infrastructura aki a introduci un PPK nobo pa tereno caminda cu bo mester para na su porta di cas 4’or of 5’or di marduga of mester warde den parkinglot di Bestuurskantoor. Esaki pasobra e minister ta esun cu ta otorga tereno na Aruba”, Otmar Oduber a duna di conoce.

 

Plataforma E Forsa Nobo, POR ta bisa bon cla cu despues di september e maneho di tereno mester ta:

Transparente, pueblo mester por sa, mester por ofrece e seguimento electronico di e peticion haci pa un tereno;

Centralisa pafo di man di politica evitando asina cu un hende mester roga na un despacho di un minister pa por haya tereno, como si fuera e no ta un derecho pa por haya un pida tereno pa por traha un cas.

 

POR ta consciente cu mester bin manehonan nobo caminda ta crea urbanisacionnan, bay halto en bes di bay hancho cu por crea seguridad manera tin na varios parti di mundo.

“Nos ta consciente cu no por sigui rosa na Aruba, no por sigui mata nos naturalesa mirando cu tin miles y miles di persona wardando pa haya un tereno pa cas. Nos ta sigur cu di awor pa september lo haci un intento grandi pa por saca algun di e terenonan aki sin mira e consecuencia cu esaki por tin pa nos naturalesa”, Otmar Oduber ta indica.

 

E ta agrega cu e intencion di elimina e rogamento cerca un Minister ta algo cu definitivamente mester pasa pa pasado.

Mescos ta e caso pa loke ta terenonan comercial. No por ta asina cu for di despacho di Minister ta dicidi ken ta haya un pida tereno, cuanto e mag di haya y tur esaki sin cu tin un transparencia.

E proceso aki tambe mester bay den un forma transparente y habri cu oportunidadnan igual pa tur hende por logra esaki.

 

Dor cu a politisa asina hopi e procesonan ta pone cu hendenan no tin mas confiansa den nan y p’esey POR ta bisa cu nan mester wordo centralisa na e departamento cu un maneho cla, raspa, habri y transparente pa comunidad pa ora nan haci un peticion pa un tereno pa un cas of un tereno pa negoshi nan sinti cu nan ta wordo trata na e forma mas husto posibel.

Top