Otmar Oduber di POR: Cu determinacion y sosten di companianan local por logra un solucion definitivo pa Dump na Parkietenbos

A yega momento pa di berdad duna e atencion necesario y busca e solucion pa e problematica di Dump na Parkietenbos. Ta trata di un problema cu tin añan sin haya un solucion y loke tin mester ta un Gobierno cu berdadero determinacion pa logra e solucion real y pone un fin na e problemanan di salud y contaminacion y tin companianan local cu por contribui cu e solucion aki.

 

Otmar Oduber di E Forsa Nobo POR comentando riba Dump di Parkietenbos a bisa cu por mira un biaha mas un paro pa loke ta un posibel solucion. POR ta lamenta cu 7 aña y mey a pasa mas otro cantidad di tempo antes cu esaki y no a haci lo necesario pa elimina e fenomeno aki cu ta afecta e parti di salubridad. Ta trata aki di aproximadamenne 10 mil hende cu ta wordo afecta directa of indirectamente pa e Dump aki na Parkietenbos. Tambe e ta un di e scenarionan di mas mahos cu nos tin na nos isla y e ta perhudicando grandemente nos bida maritimo.

 

POR ta di opinion cu tabatin suficiente estudionan y investigacionnan cu a tuma lugar pa loke ta e area aki y asina a determina cu esaki lo ta un di e prioridadnan pa cual un decision mester cay den e prome 3 luna di gobernacion despues di eleccion na september proximo.

Ademas di esaki, Oduber ta bisa cu dentro di 1 aña mester bin un solucion pa e problematica aki, e no ta algo cu por sigui aplaza.

 

“Mi ta kere cu tin hopi metodonan cu por wordo uza y hasta cu companianan local cu lo por yuda den e proceso aki y tin e capacidad pa hacie. Mi ta kere ta determinacion di un Gobierno pa bisa cu awor nos ta bay soluciona e problema aki for once and for all”, segun Oduber.

 

Ademas di esaki mester pone hopi atencion rib’e parti di conscientisacion unda cu den e mundo moderno den cual nos ta biba mester yega e momento pa cuminsa separa nos sushinan.

Top