Otmar Oduber, lider di POR: Crowdfunding lo stimula entrepreneurship, economia y beneficia negoshinan existente na Aruba

Partido POR ta desea di informa comunidad riba nos programa di gobernacion. Den e articulo aki lo dedica atencion na locual cu POR ta presenta riba tereno di e maneho economico y den e caso aki “crowdfunding”.

POR ta para pa stimula mentalidad di entrepreneurship den nos comunidad, brinda mas apoyo na inversionista local, tanto den conocemento (legal, fiscal, laboral, etc.), como tambe pa yuda facilita aceso na capital den cooperacion cu stakeholders.

Igualmente POR ta sostene e promocion di sistemanan alternativo di financiamento manera “venture capital”, “crowdfunding” y “microfinance” p’asina facilita e proceso di mobilisa capital local pa financia inversionnan local, segun Otmar Oduber.

 

Papiando specificamente di crowdfunding, esaki ta algo cu a crece hopi e ultimo añanan aki den exterior. E ta e practica di funda un proyecto dor di recauda cantidad/suma chikito di placa di un grupo grandi di persona, hopi biaha esaki ta tuma luga via di internet.

En bes cu tin e proceso tradicional di inversionistanan, campañanan di crowdfunding ta wordo funda dor di publico, esaki por inclui amistadnan, famianan, coleganan of cualkier persona cu e doño di e proyecto ta conecta cu ne.

Finalmente personanan individual cu no ta conecta n’e doño, pero cu ta kere den e proyecto tambe ta cuminsa sostene e campaña y contribui cu fondo, Oduber ta splica.

 

Mientras cu crowdfunding ta crea oportunidad cu un compania chikito no ta ricibi den formanan tradicional, e ta bon tambe pa compania cu ya ta estableci. E companianan aki kisas kier expande nan producto y ta sondea si e inversion lo ta un bon idea. Via crowdfunding a wordo comproba cu bo ta crea un entusiasmo y antisipacion prome cu lansamento di un producto.

Tambe e ta duna un bista di e audiencia y futuro cliente cu ta interesa den e product, lider di POR ta mustra.

 

Banda di e beneficionan aki, crowdfunding ta un empuhe economico y cualkier cos cu ta yuda genera entrada ta hopi necesario den e economia actualmente, mientras ta sigui encurasha entrepreneurs pa sigui bin cu productonan nobo, e ta remarca.

 

Otmar Oduber ta termina informando cu diabierna awo ainda tin e oportunidad pa duna reaccion rib’e contenido di nos “Plan di Accion” y trece bo ideanan dilanti. Por manda e reaccion/comentario aki riba info@forsanobo.com.

Top