Otmar Oduber (POR): Maneho di POR ta enfoca riba adelanto di e individuo den tur aspecto

Durante fin di siman pasa Partido Pueblo Orguyoso y Respeta (POR) tabatin e placer di bishita diferente bario rond di Aruba. Lider di POR Otmar Oduber a combersa cu pueblo riba con POR lo atende cu diferente reto cu ta biba den comunidad actualmente y e hunto cu henter e team di POR kier gradici comunidad p’e recepcion cu a ricibi.

 

Parti di e maneho cu POR ta ofrece pa e proximo gobernacion ta concentra riba adelanto di e ciudadano riba tur aspecto. Drentando casnan y papiando cu hende un di e topiconan cu ta keda resalta t’e preocupacionnan cu tin pa loke ta situacion social y costo di bida halto, pueblo ta sintie insigur y cu mester bin mehoracion den nos cuido medico.

POR ta formando un team di personanan sumamente cualifica pa atende cu cada un di e retonan aki y logra e miho solucion pa nan.

 

POR ta kere na prome luga cu kico cu kier haci riba cualkier tereno sea ta: husticia, educacion, salubridad e. o. tin cu percura pa tin un economia cu ta crece. Crece den e sentido cu e no ta solamente dependiente di e turista cu ta bishita nos isla. Esnan cu tin salario minimo no por biba cu e costo halto di bida cu tin actualmente, esaki mester wordo aumenta na un forma drastico pa tin un poder di compra mihor cu nan tin na e momentonan aki.

 

Den pasado ora cu gobierno a introduci medidanan semper e grupo mas vulnerabel a wordo protehi (e clase mas abou) y a percura pa nan haya un toeslag of toelage pa suavisa e dolor ey. Esunnan mas rico den nos comunidad practicamente no ta sintie, pero tabata e clase media cual t’e gran mayoria ta esunnan cu semper a carga e consecuencia di e medidanan.

Nos partido POR ta wak esaki net contrario y ta kere cu ta momento pa duna e grupo aki (clase media) un break riba nan loonbelasting y inkomstenbelasting pa di e forma ey nan poder di adkisicion por ta uno hopi mas sano.

 

Segun lider di POR, Otmar Oduber a splica, rond di 60% di nos comunidad ainda ta biba bou di un bestaansminimum y si por logra cu e grupo aki ta bay dilanti cu rond di mas o menos 8 – 10% den nan entrada, e placa cu nan ta ricibi ta bay circula bek cerca Gobierno.

E motibo ta cu e placa extra aki no ta un cantidad cu nan ta bay spaar, nan lo tin e den nan cartera y pues lo consumi mas den tiendanan y den supermercadonan, tur ta productonan cu mester wordo importa y consecuentmente e cantidad di importacion ta aumenta.

Top