Otmar Oduber (POR): Partido por a reuni cu SVb y ta presenta puntonan di atencion aki dos siman

Siman pasa partido POR a sinta cu SVb caminda a hiba conversacionnan den cual a concentra hopi rib’e aspecto di pensioen. Segun lider di e partido Otmar Oduber esaki ta algo cu su colega Andin Bikker a trece dilanti na diferente ocasion den Parlamento.
POR ta para pa flexibilidad di edad di pensioen, teniendo na cuenta circunstancianan di trabou diferente di e ciudadanonan, como tambe e bienestar di e fondo.

Na e momentonan aki e suma cu cada ciudadano lo por cobra como pensioen di behez ta rond di mas o menos 1100 florin, plus 100 florin di reparatie toeslag, cu ta suma na mas o menos 1200 florin y rond di 1850 florin pa un pareha.
Sinembargo, e averahe di e totalidad di personanan cu ta cobrando un Algemene Ouderdomsverzekering (AOV), na 2016, tabata rond di 600 florin. Esaki kiermen cu a pesar cu ta papia di un pensioen di 1200 florin, e averahe entre esnan cobrando pensioen den nos comunidad ta di 600 florin, cual ta mitad di e suma, sr. Oduber a enfatisa.

Esaki ta un gran preocupacion y mester dune atencion, pasobra segun cifranan suministra pa SVb ta mustra cu 80 porciento di esnan cu pension ta depende solamente riba un pensioen di behez (AOV). Cu e cifranan aki conoci, ta mas cu claro cu e calidad di bida di nos pensionadonan ta den peliger.
Esaki kiermen cu nos pensionadonan no ta alcansa di tin un bida digno bou di e situacionnan cu nos tin actualmente.

Ademas di esey, a mira cu pa motibo di cu kier salvaguardia e fondo di pension, decisionnan a wordo tuma pa pusha esaki te na 65 aña den fase. A pesar di esaki, POR ta bisa cu mester por distingi den e calidad di bida cu un persona tabatin te na momento cu e yega na su edad di pensioen.

“Nos sa cu na Aruba cu e clima cu nos ta biba den dj’e y tambe e tipo di trabou cu nos hendenan ta eherce, hopi biaha ta hacie hopi dificil pa un hende yega na un situacion sano te na e edad di 65. P’esey como partido nos a bisa cu nos si lo bin cu un oferta pa comunidad caminda lo tin e flexibilidad pa hende scoge si nan ta bay prome cu e edad di pensioen aki”, Oduber ta duna di conoce.

“Cu e informacion ricibi, Partido POR lo bay presenta proximamente su puntonan di atencion y accion rib’e tema di pensioen. Contrario na e pensamento di Gobierno y algun miembronan di Parlamtento cu no kier ni trata e posibilidad pa un alternativa pa loke ta edad di pensioen, POR ta para pa e calidad di bida di e ciudadano na prome luga y pues mester explora e posibilidadnan cu tin”, sr. Oduber a termina bisando.

Top