Otmar Oduber ta elogia e hecho cu gobierno ta continua cu e maneho laga atras riba tereno di monumentonan

Otmar Oduber di plataforma politico POR ta elogia e hecho cu Gobierno ta continuando cu e maneho laga atras riba tereno di monumentonan. Ta hustamente 12 luna pasa ora a pone e prome Seyo Monumental na Fort Zoutman y awo por wak cu Prome Minister, kende a tuma over e cartera di Cultura a sigui cu e maneho di Seyo riba monumentonan ora a pone esaki riba edifificio di Bestuurskantoor.

 

E seyo ta fungi como un simbolo di identificacion pa henter comunidad y tambe pa nos bishitantenan cu e monumento concerni ta inscribi den e Registro di Monumento y ta protehi pa ley. E tempo ey ya caba a indentifica alrededor di 35 edificio cu lo mester ricibi e Seyo Monumental cu no solamente ta proteha e edificionan protehi, pero tambe ta un forma di lanta e curiosidad y interes entre nos hendenan y turistanan pa locual ta trata nos herencia tangibel.

 

E simbolo a wordo diseña dor di Monumentenbureau mes cu aprobacion di e tempo ey Minister Otmar Oduber siguiendo e diseño di e simbolonan cu nos antepasadonan tabata uza riba e casnan. Den e caso specifico aki a scoge esun cu ta refleha e forma parecido di un flor cu ta significa proteccion pa e cas y ta uza tambe e color blau mirando cu despues di Segunda Guera Mundial, internacionalmente a tuma e color aki pa medio di e “blue shield” pa identifica monumento.

 

Otmar Oduber ta bisa cu e Seyo Monumental ta di gran importancia pasobra no ta trata solamente di edificionan bunita, cu structura unico, pero mas cu tur, edificionan cu mester keda preserva pa nan significado cultural historico, e cultura cu ta biba y cu ta un forma pa corda cada un di nos riba nos raiznan.

“E monumento ta un simbolo di e pasado, e cultura y historia, e raiznan di nos hendenan”, Oduber a declara.

 

El a menciona tambe cu e ta contento cu e colaboracion cu Hulanda ta sigui duna cu ta haci posibel pa e trabounan di mantencion y restauracion di nos monumentonan por continua.

Mescos e cooperacion estrecho cu ta continua entre Monumentenbureau, Monumentenfonds, Monumentenraad y Gobierno, cu ta haciendo tur e trabounan necesario posibel, incluyendo un bon planning pa mantencion di edificionan ya restaura, y e restauracion di mas edificio.

 

Otmar Oduber ta conclui bisando cu e ta spera cu e continuacion di maneho aki pa loke ta monumentonan por continua pa e siguiente lunanan y e expande tambe riba e otro areanan logrando un maneho integral di cultura na Aruba.

“Gobernacion ta continuacion y si tin trabounan bon a wordo haci, esakinan mester continua, esey ta e politica nobo cu nos ta para p’e”, Otmar Oduber a duna di conoce.

Top