Otro dos agente policial deteni relaciona cu e mesun caso penal cu ya caba a detene dos colega anteriormente

Den cuadro di nan maneho semper transparente Cuerpo Policial Aruba kier informa cu, relaciona cu e mesun caso di e dos colega cu a ser deteni siman pasa, otro dos colega a ser deteni p’e instancianan concerni pa investigacion.

E investigacion lo mester determina nan envolvemento den e caso menciona. Mirando cu e investigacion ta andando no por duna mas detayes n’e momentonan aki. Te aki e comunicado di KPA.

 

Nos redaccion a bin haya sa cu ta trata aki di e agentenan, Jansen y Lugart, cu ta pertenece na un di e grupo recien gradua di Academia Policial. Asina p.e. tin sigur 10 Polis cu ta deteni of suspendi, loke ta hopi.

 

SINDICATO DI POLIS DI ARUBA TA REACCIONA

Na prome lugar Sindicato di Polis kier aclarea lo siguiente cu a sali den medionan di comunicacion. E.o. a sali den AWEMainta.com cu Sindicato di Polis no por kere cu Mando Policial ta midi cu dos midi.  Tambe a sali den 24ora.com cu Sindicato di Polis lo ta rabia cu detencion di coleganan na momento cu a bay duna asistencia.

SPA ta desmenti e alegacionnan aki cu a sali den e dos medionan menciona cu sigur no ta sali for di nan seno.

SPA semper ta para pa su miembronan, pero ora cu tin investigacion andando, como un sindicato responsabel, semper lo busca mas informacion concreto y lo laga e investigacion cana su caminda p’asina no stroba esaki.

 

P’e motibo aki, SPA ta distancia su mes for di e alegacionnan/informacionnan falso aki.

SPA ta hay’e lamentabel si, cu cierto medio di comunicacion ta usa informacion for di hendenan cu no tin nada di haber of cu no sa nada di un caso p’asina mal informa un pais y e mal informacionan aki ta wordo mal usa contra nan miembronan den medionan social den un forma cu SPA no ta para pe.

 

Tambe SPA ta lesando y scucha diferente acusacion cu ta bin den direccion di nan coleganan-miembronan cu ta atacha nos Cuerpo Policial.

“Nos por a scucha con ta usa nomber di nos Korpschef cu tambe ta un miembro di SPA. Cuerpo Policial Arubano ta un Cuerpo profesional y semper y cuando lo keda haya hende cu no ta di acuerdo cu e proceduranan cu tin den un organisacion profesional.

 

Un departamento cu ta resorta bao di Cuerpo Policial a entrega placa na cierto lugar. E ta tarea di e departamento aki y nunca di Korpschef.  Esaki t’e procedura normal den cierto caso pa cu e protecion di e persona aki.

Tur entrega di un recompensa tin un procedura pa mantene su mes na dje. Ta zona straño sigur p’esnan cu no conoce e procedura aki y peor ainda p’esnan cu no ta traha cu un procedura asina.

 

Ta lamentabel si cu un persona por hinca su mesun bida y tambe di su famia den un problema serio, dor di admiti publicamente kico el a haci y despues cu ayudo di Polis mes e tin cu busca ora cu e problemanan aki bati na su porta. Te aki e comunicado cu SPA a emiti ayera tambe.

 

Pero si SPA kier ta transparente, manera Cuerpo di Polis ta menciona den su relato, anto no papia mitar berdad.

 

 

 

 

 

Top