Otro mula recidivista….Shutqlene Maria ta bay será atrobe pa intento di pasa droga

WILLEMSTAD – E ciudadano Shutqlene Maria di 47 aña di edad, oriundo di Groot Santa Martha, e siman aki atrobe tabata den sala di Corte acusá di intento pa pasa droga.

Tabata dia 28 di mei cu a gar’é gulí cu bolitanan cu a yega n’e peso total di 1220 gram.

Dilanti di Huez den sala di Corte Shutqlene a harma henter un historia cu algun persona a oblig’é pe guli bolita pa di tal manera e paga un debe bieu cu e tin.

 

Huez a puntra e acusado si e por proba loke e ta pretendé. Shutqlene Maria a reaccioná bisando cu e tabatin hopi miedo di esnan cu a oblig’é pa nan no hacié algo.

Fiscal señora mr. Dennaoui-Simon mesora a bin cu e pregunta pakico e mesun hendenan aki lo no bolbe pone presion riba Shutqlene pa atrobe e purba pasa droga. Riba esaki e acusado no tabatin un reaccion convincente.

 

Natural si ta trata cu lo e mester kita un debe bieu, anto mester reconocé cu e acusado aki ainda no a logra esey. Esaki kier men cu cualkier momento lo por bati atrobe na su porta y pon’é bou di presion.

Segun e acusado ta trata aki di un debe di 6 aña bieu y cu direpente ata nan na su porta exigiendo pe guli bolita pa paga debe bieu, pero el a hura cu esaki lo t’e último biaha cu algo asina lo sosodé cuné.

 

Fiscal a sigui puntra dicon e acusado no a bisa Polis maske ta na Aeropuerto cu e ta haciendo cosnan robes bou di presion.

Remarcabel ta cu den pasado caba Shutqlene Maria a trata na pasa droga na Bonaire, na Hulanda y esaki kier men cu e no ta limpi pa loke ta trata delitonan di droga.

Pa su defensa e acusado aki tabatin abogado mr. Engels, kende a pidi masha pa tene cuenta cu e circunstancia personal di su cliente.

 

E hòmber aki ta tata tin yiunan menor di edad, esta 12 aña, 15 aña, 18 aña y otro cu ta mayor di edad. E acusado a pidi Huez masha pa no lag’é bay será como cu e tin un responsabilidad pa cuido di e yiunan.

Tòg a trat’é comosifuera un first-offender, como cu e casonan di intento pa pasa droga ya ta algun tempo pasá.

Fiscal a pidi un castigo di prizon di 24 luna di cua 12 luna condicional y un periodo di prueba di 3 aña.

 

Huez mr. Gruijters a bisa claramente di no ta kere nada di e declaracionnan di Shutqlene Maria, como tal e pruebanan ta legal- y convincentemente probá.

E castigo cu Huez a dicta a bira finalmente 20 luna di prizon di cua 12 luna condicional y un periodo di prueba di 3 aña.

Guia di parti di Reclassering manera Fiscal a pidi, Huez no a considerá necesario.

Leave a Reply

Top