Pa 2017 ya DTI a aproba caba 600 punto nobo di luz den barionan

Sr. Dominico Werleman ta Director di Dienst Technische Inspectie (DTI), e departamento encarga cu e parti di control di e luznan cu ta wordo poni riba caya.

Werleman a splica cu DTI tin un rol di coordinador den henter e proyecto di Luz den Bario.

E peticionnan ta wordo manda na DTI cu ta manda su funcionarionan n’e sitio pa haci un evaluacion di e area, y studia si mester di luz y cuanto.

Despues ta traha un raport cu conseho p’e Minister concerni, cu den e caso aki ta Minister Presidente Mike Eman, pasobra ta trata di un programa di iluminacion p’e barionan.

Pero e proyecto ta wordo financia dor di Ministerio di Infrastructura, bou di cual DTI ta resorta.

 

“Nos ta coordina e trabou y despues duna ordo na Elmar NV na unda mester pone e luznan cu a keda aproba,” el a splica.

El a splica cu e programa di iluminacion den bario ta haya hopi peticion. P.e. aña pasa a duna aprobacion adelanta pa 400 punto di iluminacion nobo, mientras cu pa 2017 a duna aprobacion pa 600 punto nobo caba.

 

Den e plan cu a wordo traha, segun Werleman, Gobierno a dicidi cu ta bay cambia tur e luznan di caya pa e luz nobo di sistema di LED cu ta duna hopi mas claridad, pero tambe ta mas eficiente den consumo, y adicionalmente a dicidi cu lo pone 3 mil luz.

P’e ultimo grupo aki e departamento di DTI mester duna su aprobacion.

Elmar NV ta trahando den forma simultaneo unda cu ta traha pa cambia luznan di caya p’esnan LED, y tambe ta instala e luznan nobo den barionan unda habitantenan pa hopi tempo a biba den scuridad.

 

For di momento di e prome Gobierno lidera pa Prome Minister Mike Eman a scucha di e preocupacion di ciudadanonan cu hopi bario a wordo crea, pero nunca a percura nan iluminacion. Esaki ta motibo cu a crea e programa ‘Luz den Bario’ via cual poco-poco ta cuminsa ilumina barionan cu a wordo lubida pa hopi tempo.

Esaki a cuminsa na final di 2012 pa cuminsamento di 2013. A dicidi pa deshaci di luznan convencional y bin cu luznan LED cu ta hopi mas eficiente y lo trece alivio p’e presupuesto di Gobierno tambe.

 

Top