Pa dos aña consecutive, actividad economico di Aruba a baha

“State of the Economy” 2016

Pa dos aña consecutive, actividad economico di Aruba a baha

 

Awe Banco Central di Aruba (BCA) ta publica e asina yama “State of the Economy” p’e di 4 trimester di 2016. E publicacion aki ta provee un sinopsis di e desaroyonan economico local y internacional pa 2016.

E puntonan mas importante ta wordo presenta abou, incluyendo un resumen di e indicadornan economico principal.

 

Na 2016, pa di dos aña consecutivo, actividad economico di Aruba a baha. E motibo principal tabata un caida den actividadnan den e sector di turismo, primordialmente debi n’e situacion economico y politico na Venezuela.

E crecemento realisa dor di otro mercadonan turistico, manera Merca, no tabata suficiente pa contraresta e desaroyo negativo aki.

Igualmente, condicionnan local tambe a afecta e desaroyo economico negativamente, mirando cu consumo local a mengua, mientras cu inversion priva a keda practicamente flat debi cu e comienso di e rehabilitacion di e refineria anticipa a keda posponi pa 2017.

 

Apesar di e retraso economico, e confiansa di negoshinan local y consumidornan den expectativonan a corto plaso den e economia di Aruba a mantene nan mes durante 2016. Sinembargo, negoshi y consumidornan a expresa preocupacion pa loke ta trata e perspectivanan pa futuro y e incertidumbre persistente.

Recien estudionan di mercado tambe ta sugeri cu un mayoria di consumidornan local actualmente ta haci uso di comercio electronico (e-commerce) pa cumpra directamente for di exterior, cual ta afecta comercio local di forma significante.

 

Ademas, e oferta di acomodacionnan priva pa turistanan ta keda un trend cu ta sigui crece den e ultimo añanan.

Credito domestico di e sector bancario n’e sector priva a expande cu 1,8 porciento den 2016. Credito na empresa como tambe fiansa pa construccion di cas a contribui n’e crecemento di credito domestico.

Di otro banda, credito na consumidor a disminui, continuando e tendencia descendiente cu a persisti desde 2009.

 

Na 2016, entrada di Gobierno como tambe e gastonan di Gobierno a subi marginalmente, resultando den un deficit financiero (incluyendo cambio den pagonan atrasa) di Afl. 183,5 miyon (2015: Afl. 161,0 miyon).

A financia e deficit principalmente atrabes di prestamo externo. E debe total di Gobierno a crece cu Afl. 47,2 miyon na un total di Afl. 4.021,3 miyon na fin di 2016, mas tanto e resultado di un expansion di Afl. 140,2 miyon na debe externo relata na dos fiansa priva riba e mercado internacional na mei 2016.

 

Cu e desaroyonan aki, e debe den porciento di e PBD di Aruba ta estima di a yega na un 84,2 porciento na fin di 2016 (2015: 82,5 porciento).

Como resultado di prijsnan di energia cu a cay y prijsnan di cuminda y bienes modera, a experiencia presionnan deflacionario durante 2016.

Na final di 2016, promedio anual di inflacion a yega −0,9 porciento. E desaroyo aki a mehora Aruba su posicion competitivo contra esun di su partner comercial principal, esta Merca.

 

Placa den circulacion a crece cu 9,5 porciento den 2016. E aumento aki ta debi na un Afl. 261,8 miyon di fluho di divisa, pa mayoria parti relata na ingreso turistico y prestamonan di Gobierno den exterior.

E balansa di pago a registra un surplus di Afl. 261,8 miyon den 2016, compara cu un surplus di Afl. 342,7 miyon den 2015. Tanto e cuenta coriente como e cuenta di capital y di finansa di e balansa di pago a contribui n’e surplus realisa.

 

Un crecemento fuerte a tuma lugar den e reservanan oficial. Consecuentemente, reservanan total (incluyendo diferencianan den revaluacion) a alcansa Afl. 1.892,4 miyon na fin di december 2016, y e tasa di cobertura di importacion a mehora di 4,6 luna (fin di december 2015) pa 5,1 luna.

 

Tabel: Indicadornan economico principal pa 2016
Indicador 2015

Jan-Dec

2016

Jan-Dec

Cambio
Ingreso turistico (Afl. miyon) 2.936,6 2.902,1 −34,5
Cantidad di turista 1.224.935 1.101.954 −122.981
Cantidad di cement importa (1000 kg.) 46.500 50.620 4.120
Entrada di BBO (Afl. miyon) 93,5 94,1 0,6
Impuesto riba entrada y ganashi (Afl. miyon) 488,8 500,7 11,9
Tasa di inflacion, promedio anual (porcentahe) 0,5 −0,9 −1,4
Indice di Confiansa di Consumidor (punto di indice) 95,1 96,1 1,0
Debe di gobierno (Afl. miyon) 3.974,1 4.021,3 47,2
Fuentenan: BCA, ATA, CBS.

 

E publicacion completo ta disponibel riba BCA su website (www.cbaruba.org).

 

 

Top