Pa evita mas manipulacion, FTA a dicidi di pidi Mediador di Gobierno pa organisa un referendum na FCCA

E situacion na FCCA ta bayendo den un direccion cu FTA no ta desea, pero nan ta wordo dirigi p’e propio gerencia di FCCA.

Manera ta conoci, e trahadornan di FCCA ta miembro di FTA pa basta aña caba, pero awor nan kier pa negocia un CAO.

Ta trata di mesun trahadornan cu for di un principio tabatin un acuerdo, cu ta regla nan posicion huridico, pero awor e mesun trahadornan aki ta di opinion cu nan por logra mas cu un CAO enbes di e areglo di e posicion huridico aki.

 

Di acuerdo cu Presidente di FTA, Hubert Dirksz ta kere cu sigur un CAO ta importante, cu ta mara na ley, mientras cu e actual areglo di  posicion huridico cu tin na FCCA, e ta pisa mas pa banda di FCCA mes, cu p’e trahadornan.

No tin un balance y maske cu FTA ta representa dicho trahadornan, nunca por a negocia un CAO pa nan.

 

Awor tin un grupo cu kier un CAO, derepienta FCCA ta bisa cu mester organisa un votacion pa sa na ki banda e trahadornan kier bay, esta ta mantene e areglo di nan posicion huridico actual of lo negocia un CAO. E votacion aki no ta un referendum.

Pero gerencia di FCCA ta maniobra pa delata e proceso pa gana tereno, y FTA no ta di acuerdo cu esaki.

FTA ta haya cu un referendum ta mas na su lugar, pero tog a dicidi pa laga e votacion tuma lugar, cu no ta mara na ley.

 

E votacion a tuma lugar diabierne ultimo, y e resultado tabata masha sera, y diamars ultimo, FTA a dicidi di haci un peticion na Mediador di Gobierno pa organisa un referendum, segun Hubert Dirksz.

 

 

Top