Pa loke t’e reconocemento cu STA ta demanda di N.V. Elmar – Mediador di Gobierno mester asumi su responsabilidad

Segun Diego de Cuba y tambe e ta spera cu Gobierno nobo trece cambio den companianan estatal

 

 

Cueste loke cueste, STA y miembronan di Elmar, kier cabes di Director di N.V. Elmar, Robert Henriquez. Ya caba e sindicato a recauda mas di 100 firma, cu ta motibo cu STA a manda un carta caba pa Mediador di Gobierno, Anselmo Pontilius p’e tuma accion den e caso aki.

 

Segun Presidente di STA, Diego de Cuba, e no por permiti pa gerencia di N.V. Elmar a hunga cu pan di tata y mama di famia. Pesey den e carta pa Mediador di Gobierno, STA a manda su puntonan di bista pa por keda cla cu e protocol cu gerencia di N.V. Elmar mester firma y asina reconoce e delegadonan di STA y tambe obligatoriamente N.V. Elmar reconoce STA como representante sindical di e compania.

 

Tanten cu gerencia di N.V. Elmar no firma e protocol, oficialmente e compania no ta reconoce STA y si gerencia di N.V. Elmar no kier reconoce e delegadonan di STA, ta nifica cu Diego de Cuba tampoco ta wordo reconoci.

Pasobra e delegadonan t’esnan cu berdaderamente ta vocifera e dolornan di demas miembronan. Pesey Diego de Cuba a pidi sr. Robert Henriquez pa baha un rato for di e nubianan ey, ban sinta manera hende grandi, si berdad gerencia kier mira un solucion rapido.

Pasobra si esaki no sosode, segun Presidente di STA, e ta premira problemanan bastante serio na horizonte.

 

Na opinion di Diego de Cuba, Mediador di Gobierno mester demanda gerencia di cualkier compania reconoce un sindicato cu a gana representacion di e empleadonan. Esaki ta di acuerdo cu ley, anto ta competencia di Mediador di manda nan Corte y e ora ey, STA lo agrega su mes den dicho caso.

E social protocol cu N.V. Elmar kier bin cun’e, pa her-inrichting, STA por bay di acuerdo cu nan, pero STA tin su observacionnan tambe.

STA no ta firma pa loco, pero e miembronan mester sa di tur cos. Ningun sindicato lo firma un documento cu ta perhudica e trahadonan di N.V. Elmar mes, y p’esey tanten cu STA no haya e parti presenta na N.V. Elmar, lo no firma ningun documento.

 

STA kier un inventarisacion completo di N.V. Elmar, tambe e sindicato kier e organogram nobo cu N.V. Elmar tin den mente pa fit su empleadonan.

Diego de Cuba ta en espera di e Gobierno nobo, cu a priminti cu lo bin cambio den tur e companianan estatal. Otro gay lo canta, pasobra loke ta pasando ultimo añanan, no a beneficia ningun hende y sigur no e empleadonan.

E siman aki, ta spera un solucion definitivo, de lo contrario por spera accion pisa na N.V. Elmar.

 

 

 

Leave a Reply

Top