Pa luna di september, Aruba a yama bon-bini na 77.644 bishitante

E total di turismo ‘stay-over’ pa nos isla a keda casi igual cu un aumento di 0.4% si compara esaki cu september 2016.
Si exclui e bishitantenan di Venezuela, por mira un aumento di 11.3% cual ta igual na un total di 66.090 bishitante pa nos isla. No obstante e caida di mercado Venezolano, e aumento aki ta un indicacion di stabilidad y crecemento continuo di Aruba su turismo.
Alabes, e cifranan ta indica crecemento den mercadonan clave pa Aruba, manera Merca, Canada, Brazil, Argentina y Alemania.

P’e asina yama year-to-date 2017, 797.457 turista a bishita nos isla, cual ta 6.2% menos cu e mesun temporada aña pasa. Si nos exclui e bishitantenan Venezolano, por mira un aumento di 7.9%, ekivalente na 726.444 bishitante.

TURISMO ‘STAY-OVER’
Aruba ta wordo representa den tres diferente continente. Compara cu september aña pasa, pa 2017 e turismo procedente for di e continente Norte Americano a aumenta cu 13.1% y ta trece 59.2% di total di turismo pa nos destinacion.
Na september, Merca a aumenta cu 12.6% y Canada cu 22.1%. P’e prome 9 lunanan di 2017, e continente aki a subi cu 9.3% pa turismo pa Aruba.

Continente Latino Americano a baha cu 22.3% di cual Venezuela a baha cu 35.7% compara cu september aña pasa.
Brazil a subi cu 43.1% y Argentina a subi cu 24.5%. E continente di Latino America ta trece 26.1% di e total di turismo pa luna di september na nos isla.
P’e prome 9 lunanan, turismo procedente di Latino America a baha cu 38.8% primordialmente mara na caida for di Venezuela.

Pa loke ta Europa por nota un cu turismo a aumenta cu 7.4% compara cu e mesun luna aña pasa. Hulanda a keda casi igual, cu un aumenta di 0.5% y Alemania a aumenta cu 25.3%.
E continente Europeo ta representa 11.4% di turismo pa Aruba pa luna di september.
P’e prome 9 luna, Europa a trece 5.2% turista mas pa Aruba compara cu e mesun temporada na 2016.

TURISMO CRUCERO
Durante september 2017, 23.863 pasahero crucero a bishita nos destinacion riba un total di 12 diferente barco crucero. Compara cu luna di september aña pasa, turismo crucero a crece cu 11.5% (september 2016 Aruba a haya 21.411 bishitante for di 7 crucero).
En total p’e prome 9 luna di 2017, Aruba a ricibi 537.069 pasahero crucero for 225 diferente barco. Esaki ta ekivalente na un aumento di 22.3% pasahero adicional pa nos isla (20 barco crucero mas) compara cu e mesun temporada aña pasa.

Ademas di e cifranan aki, ta bon pa menciona cu september t’e ultimo luna di e asina yama ‘low-season’ (temporada abao) cu normalmente ta for di luna di mei te cu september.
Como parti di e strategia di A.T.A. tabata enfoka pa crece mas tanto posibel durante low season ta demostra den resultado di crecemento cu 77.3% compara cu e low season 2016.

Leave a Reply

Top