Pa yiu cu a bati su mama…..Abogado a pidi Corte pa ordená aresto di e yiu

PHILIPSBURG – Abogado Geert Hatzmann na Sint Maarten dialuna a entregá un keho oficial na Corte di Husticia contra loke e ta considerá un caso di abuso di marca mayó caminda un homber di 35 aña a bati su mama te kibra su brasa y te ainda Polis no a arest’é.

E maltrato bestial a tuma lugar dia 22 di febrüari y e señora tin 58 aña.

 

A pasa casi 3 siman y te ainda e abusador ta liber loke tin e abogado hostiná, pasobra aparte cu e ta atendiendo e caso legalmente den Corte, como hende e no por tolerá cu e abusador ta laga liber bay bin.

Siman pasá e abogado a informá medionan di comunicacion di e caso den su esfuersonan pa convence Ministerio Publico pa laga arestá e abusador.

El a splica cu pe, ta mas cu escandaloso cu homber den flor di su bida ta bati un muher cu ta su mama di tal manera cu despues di dos siman te ainda e no por cana.

 

Den e caso aki husticia mester prevalecé y lo minimo ta pa sera e homber, pero na lugar di esey husticia ta laga e homber sigi su caminda.

Ministerio Publico no por keda sconde tras di e èxcüus cu nan falta investigador, pasobra e caso a sacudí orden legal y no por ‘bende’ e argumento aki cu e victima, kende ta altamente traumatisa pasobra e yiu a batié pa mata.

 

Na parecer di e abogado e actitud di Ministerio Publico ta casi un invitacion di e famianan pa busca e yiu y batié of hasta mat’é.

Te cu ayera publicidad riba e caso no a duna resultado serca autoridadnan.

El a yama Polis atrobe ayera tardi y te ainda nan no a arestá e homber.

Por lo tanto el a manda un keho por escrito contra Ministerio Publico caminda e ta pidi Corte di Husticia pa ordená pa laga arestá e homber inmediatamente.

 

Di otro banda ta reaccion positivo so el a haña di tur sector di comunidad.

Pero esencia di e caso ta cu te ainda Ministerio Publico no a haci nada al respecto, asina el a bisa.

Vocero di Ministerio Publico, Gino Bernadina a splica cu por tene cuenta cu aresto lo cay den futuro sercano, pero cu awor ta mucho tempran pa bisa ki dia.

Top