Pabien na henter e team y esnan envolvi, e tabata haci falta

Otmar Oduber a bishita e Prome Mercado di Santa Rosa diadomingo ultimo y a felicita henter e team y tur esnan envolvi pa reactiva e mercado aki un biaha mas mirando cu e tabata haci hopi falta.

Durante su bishita Otmar Oduber a haya e oportunidad di papia cu varios di esnan presente cu a expresa nan alegria di por conta cu e Mercado di Santa Rosa un biaha mas, nan tabata sinti su falta pa cumpra nan remedinan di tera, nan cuminda, matanan y diferente otro producto local.

 

Oduber ta contento di mira con e idea cu a nace tempo cu e tabatin e cartera di Sector Primario, esta di promove e sector aki den comunidad y pa promociona nos agricultura, cria y pesca entre nos hendenan ta continua.

Semper el a gradici trahadornan di Santa Rosa cu a demostra e stimacion grandi pa loke nan ta haci y cu for di cuminsamento a carga e mercado aki braza habri, independiente cu ta riba nan dia liber.

 

Otmar Oduber ta spera cu lo sigui promove nos sector primario y sigui duna e sosten n’e Mercado di Santa Rosa cu t’asina gusta no solamente entre nos mesun hendenan, pero tambe entre nos bishitantenan cu ta sinti e ambiente local durante nan vacacion na nos isla.

Leave a Reply

Top