Paciente Danila Igmar Boekhoudt: Biba riba dialyse ta exigi hopi disciplina!

Dia Mundial di Riñon ta cay riba e di dos diahuebs di maart loke ta nifica cu diahuebs dia 9 di maart mundialmente a reflexiona riba e complicacionnan cu enfermedad di riñon por trece cune como tambe con pa preveni esakinan.

Dr. Horacio E. Oduber Hospital tambe ta haci uzo di e oportunidad aki pa acentua e problemanan cu esaki ta encera no solamente pa hospital como institucion pero mas ainda p’e paciente.

 

E aña aki e tema ta obesidad pa motibo cu esaki ta un problema mundial cu ta toca Aruba tambe. E ta un di e causanan mas grandi di presion halto, diabetes como tambe enfermedadnan cardiovascular.

Esakinan ta trece cune daño na riñon cu consecuencia cu hopi biaha e paciente aki ta caba na dialyse. Asina e dañonan aki pasa no tin cura mas!

 

Paciente di dialyse na Dr. Horacio E. Oduber Hospital, esta Danila Igmar Boekhoudt a splica cu el a cuminsa dialisa na mei 2012.

“Mi tabata dialisa tres biaha pa siman, esta riba diamars, diahuebs y diasabra”.

Dialyse no tabata algo facil p’e..…“Pero ami ta un persona hopi positivo y mi ta pone meta. Ora bo kier logra algo bo ta bay p’e.

E impacto cu dialyse a haci riba mi bida tabata limita mi na cierto ora. E ora mi mester a hinca mi bida den un regla y rutina cu mi por a logra yega na tur mi metanan. Sabiendo cu tres biaha pa siman mi ta mara na 4 ora na un mashin,” el a bisa.

 

“Mi conseho ta cu si bo kier logra algo den bo bida y bo kier ta un mihor persona den bida bo ta bay pa loke bo kier y logra.

Dialyse no ta algo facil pero no ta algo imposibel y si bo duna di bo mes lo bo logr’e. Asina ta si bo ta na tempo acudi pa bo wordo yuda,” el a conclui.

 

Dr. Horacio E. Oduber ta existi desde aña 1976 y su nomber ta na honor di e prome dokter Arubiano. Cu mas di 1000 empleado trahando diariamente pa atende e mas di 16.000 paciente pa aña, Hospital ta conta cu 320 cama y ta brinda un variedad grandi di servicio medico na nos comunidad y na turistanan.

Pa por eherce tur e intervencionnan medico aki, Hospital ta conta cu un centro di rehabilitacion, un centro di terapia fisico, un departamento di emergencia, wondenpoli, diabetes center, pain clinic, oncologia day-care unit, 5 sala di operacion, Intensive Care Unit y asina por sigui menciona.

 

Top