Pago di number di auto na MFA ta rapido y eficiente

Como parti di e trabou den ekipo cu MFA Noord y Paradera ta haciendo cu Departamento di Impuesto pa maneha e fluho grandi di clientenan, ta implementa dos servicio adicional cu ta agilisa e proceso di pago di number di auto.

Ademas di un persona exclusivo pa controla cu tur cliente tin e documentonan nan ordo, tambe ta duna acceso na computer y internet pa haci pagonan online.

 

E funcionario adicional ta un sistema cu a funciona hopi bon na MFA Paradera y p’esey a opta pa aplik’e na Noord tambe. Banda di e balienan regular, tin un mesa cu un persona cu ta atende e cliente despues cu esaki a coy su number y bay ariba.

E funcionario ta haci un trabou di prepara e documentonan y anotacion pa ora yega na e cahero, esaki ta proceso tur cos mas lihe. “Esey ta yuda hopi cu nos por maneha e fluho di hende hopi mas lihe”, asina Richard Tromp, Gerente di MFA Noord a bisa.

 

E mesun persona tambe por prepara e documento pa despues e cliente por haci e pago sea na banco of online. Pa esaki no mester coy number ni para den rij.

Tampoco mester bay cas; na MFA Noord mester ta dirigi e cliente pa e computernan cu acceso na Wi-Fi. Den 10 minuut ta keda cla y ta bay bek ariba pa haya su stempel sin mester di para den rij.

Top