Pais Aruba ta den decadencia total! Jeffrey Kelly ta sigui sostene e bagamunderianan di su Gobierno pa loke ta huurmento di edificio Di acuerdo cu fraccion di MEP

Un biaha mas nos por a scucha e Parlamentario di AVP, Jeffrey Kelly canta e tumba raya “Huurmento di edificio di Gobierno” sin cu e pober tin e nocion di kico ta e maneho di su Gobierno rib’e tereno specifico aki.

Bo mester ta un Parlamentario ignorante y incapaz di vota ciegamente pa un presupuesto 2017, pero cu te ainda bo no ta realisa cu durante Gabinete Eman e gastonan di huur a aumenta den forma nunca visto y riba dj’e bo kier mustra dede den direccion di MEP.

 

Hecho ta cu e gastonan di huur a aumenta y yega te na 23 miyon florin pa loke ta aña 2017, siendo cu e averahe di gastonan di huur bao di Gabinete Oduber tabata 17 miyon florin.

Den su ignorancia Jeffrey no ta realisa tambe cu su partido AVP a gana eleccion bisando cu nan ta bay elimina huur di edificio, pero cifranan concreto ta demostra cu nan a huur y lo sigui huur mas edificio ainda for di nan compinchinan politico.

 

Intrasparencia total

Contrario na e maneho descabeya aki durante Gabinete Oduber e maneho tabata pa gradualmente reduci e gastonan di huur di edificio di Gobierno. Tabata den cuadro di esaki cu Gobierno di MEP via SOGA a laga construi tres edificio di Gobierno, esta esun di DOW y DIP na Sabana Blanco, e edificio di Finanza y Belasting na Camacuri y e edificio di ATA na L.G. Smith Boulevard. Pero kico por a mira durante e ultimo 7 añanan?

 

Gabinete Eman a sigui huur mas y mas edificio for di nan compinchi, amigo y familiarnan y debi na nan intransparencia pa loke fondonan publico nan ta nenga di publica nomber di e personanan for di cual nan ta huur tur e edificionan aki, treciendo e argumento estupido padilanti cu esaki ta un secreto entre Gobierno y e doñonan di e edificionan aki. Sin duda e intransparencia aki bo no a haya nunca bao di un gobernacion di MEP!

 

Edificionan den deterioro

Alavez ta remarcabel cu Jeffrey Kelly na ningun momento so kier papia di kico su Gobierno lo bay haci cu tur e edificionan cu nan ta lagando den ruina total, esta e ex-edificio di DOW, e ex-edificio di Voogdijraad den Emanstraat, e ex-edificio di John F. Kennedy school, e ex-edificio di Instituto di Cultura, e ex-edificio di Relacionnan Exterior, e ex-edificio di Domeinbeheer, e edificio di ex-Bushiri Hotel.

 

Por cierto, pa loke ta e edificio di ex-DOW, ex-Minister Rudy Croes tabatin tur e plannan den fase avansa caba pa muda e Warda di Polis di Playa pa e sitio banda di waf aki.

Y manera ta un custumber caba, e Gobierno di AVP despues di 7 aña no a sigui cu e plan aki te cu e edificio poco poco ta convertiendo su mes den un ruina total, mescos cu e Warda di Polis di Playa. Pues finalmente, ni un ni e otro pa loke ta ubicacion di nos Cuerpo Policial, danki na e Gobierno malo di AVP!

 

Por lo demas, tur e otro edificionan tampoco no ta sirbi pa nada mas y ta muestra di e decadencia cu e Gobierno a hinca nos pais aden y di cual Jeffrey Kelly ta e gran sostenedor di tur e bagamunderianan aki.

Top