Papiamento ta bolbe marca historia

E idioma nacional y oficial di Aruba, esta Papiamento, ta bolbe marca historia. E biaha aki cu e publicacion linguistico: “Manual di Gramatica di Papiamento – Sintaxis”.

E publicacion ta skirbi na Papiamento y publica pa Departamento di Enseñansa Aruba.

 

Diahuebs ultimo, 6 di april 2017, Departamento di Enseñansa Aruba a haci entrega oficial di “Manual di Gramatica di Papiamento – Sintaxis” na Minister di Enseñansa Michelle Hooyboer-Winklaar. E entrega a ser haci pa Audrey Tromp-Wouters, coordinado di Proyecto Idioma den Enseñansa, Maureen Molina-Luidens, coordinado di e proyecto di gramatica sintaxis, y Annemarie Proveyer-Groot, directora di Departamento di Enseñansa Aruba.

 

Linguistica ta e ciencia cu ta studia idioma den tur su aspectonan. Gramatica ta forma parti esencial di e ciencia aki. Gramatica ta studia sistema di lenga.

Pues, e ta studia e conhunto di regla cu un idioma tin pa forma palabra, combina nan y uza nan den construccion di frase. E partinan fundamental di gramatica ta morfologia y sintaxis. Morfologia ta studia structura, formacion, funcion y nificacion di palabra di un lenga. Sintaxis ta studia con ta ordena, coordina y subordina e palabranan y e relacionnan cu e palabranan aki tin den frase.

 

Despues di publicacion di “Manual di Gramatica di Papiamento – Morfologia” (Departamento di Enseñansa Aruba 2010), a sigui cu e trabou pa realisa un manual di gramatica di Papiamento, pero e biaha aki di sintaxis.

E grupo di trabou tabata consisti di 3 docente di Papiamento y 2 linguista: Marilou Boezem, Selvia Lumenier, Juan Maduro, Ramon Todd Dandaré y Maureen Molina-Luidens cu tambe a coordina e proyecto y a redacta e manual.

E diseñador grafico ta Sheila Werleman. FDA a financia e publicacion cu tabata na encargo di Proyecto Idioma den Enseñansa.

 

E organisacion pa preparacion di e trabou a inicia dia 19 di mei 2010. E trabou oficial mes cu e grupo di trabou a cuminsa dia 25 di augustus 2010.

Dia 27 di september 2016, e prome cinco bukinan di “Manual di Gramatica di Papiamento – Sintaxis” a yega Aruba for di imprenta. Pero pa a realisa esaki, tabatin un total di 122 reunion cu tabata tuma luga tur diahuebs for di 8:30 di mainta te 12:30 di merdia

Durante e reunionnan, e miembronan di e grupo di trabou tabata intercambia, argumenta, adapta y coregi otro su trabou.

Banda di e reunionnan, cada autor tabata investiga y skirbi su parti pa despues trec’e den e reunion di tur siman.

 

E manual aki ta un buki di referencia dirigi na e docente di Papiamento y na e desaroyado di curiculo pa sostene nan den nan trabou. E manual ta trata principalmente frase y nan structura, cual e profesional por consulta pa haya mas informacion tocante e reglanan di e idioma y/of pa soluciona duda specifico cu e por tin tocante uzo corecto di Papiamento.

 

Despues di 5 aña di trabou investigativo y varios luna di redaccion, nos por ta orguyoso cu e publicacion aki. Alabes ta participa cu “Manual di Gramatica di Papiamento – Sintaxis” ta e prome manual di sintaxis den historia di Papiamento.

Top