Paradise papers: E investigacion nobo di e paraisonan fiscal cu ta menciona Aruba su nomber

Dos buffet di abogado, 19 registro mercantil, 13.4 miyon di documento, 1.4 terabyte di informacion

 

 

El Confidencial y La Sexta, den marco di un investigacion internacional cordinada p’e “Consorcio Internacional de Periodistas de Investigación (ICIJ)”, a cuminsa publica diadomingo e resultadonan di un aña di trabou. Esakinan ta e preguntanan clave pa por compronde e Paradise Papers y nan alcance.

 

  1. Kiko ta Paradise Papers?

Paradise Papers t’e nomber di un investigacion periodistico basa den un filtracion multiple. Nan ta inclui 13.4 miyon di documento procedente for di:

  • Dos buffet di abogado dedica na duna servicio ‘offshore’: Appleby, funda na Bermuda, y Asiaciti Trust, na Singapur. For di e prome a haya 7 miyon di documento; for di e di dos, rond di mey miyon.
  • E registronan mercantil di 19 hurisdiccion cu ta paraisonan fiscal, manera: Antigua y Barbuda, Aruba, Bahamas, Barbados, Bermuda, Cayman Islands, Dominica, Granada, Sint Kitts & Nevis, Saint Lucia, St. Vicent y Trinidad & Tobago (Caribe); Cooks Islands, Marshall Islands, Samoa y Vanuatu (Oceania); Malta (Europa), Libanon y Labuan, teritorio federal di Malasia (Asia).

 

Den total, mas di 380 periodista di 67 pais a investiga, durante un aña e 1.4 terabyte di informacion ricibi.

 

  1. Ki tipo di informacion ta aparece den e filtracion masivo nobo aki?

Paradise Papers ta devela e scondemento di patrimonionan y e movencion di cantidadnan grandi di placa leu for di e wowonan di control fiscal, di parti di multimiyonarionan y empresanan multinacional.

No ta pornada cu e oferta basico di Appleby ta basa su mes riba servicionan corporativo, constitucion di trust funds y e gestion di fondonan di inversion.

Den e nomber di mas ilustre cu por haya den e 13.4 miyon di documento di e filtracion nobo aki, por e entorno di Donald Trump y su link cu inversionistanan na Rusia; e recaudado di e campaña electoral di e prome Minister di Canada, Justin Trudeau, of reina Isabel II di Reino Uni, ademas di famosonan di talla mundial, manera e cantantenan Bono di U2 of Madonna.

 

Empresanan multinacional importantes na nivel mundial, manera Glencore, Apple of Nike, tambe tin un lugar destaca den e investigacion nobo aki. P

 

  1. Ken nan ta y na kiko Appleby y Asiaciti ta dedica?

Funda n’e pais caribense di Bermuda na final di añanan 90, Appleby ta un oficinan di abogado cu ta ofrece servicionan ‘offshore’ na su clientenan.

Nan ta conta cu 10 oficinan rond mundo, tur den paisnan cu ta ofrece fiscalidad hopi abou of nulo.

Appleby ta forma parti di e asina denomina ‘circulo magico offshore’ de e grupo selecto di e nuebe oficinanan di abogado mas prestigioso y cu mas recurso pa duna servicionan ‘offshore’. Su clientenan mayoria biaha ta hendenan cu fortunanan cuminsando na 30 miyon dollar, conoci popularmente como UHNWI (for e decripcion na ingles ‘ultra-high-net-worth individual).

 

Cu sede na Singapur, Asiaciti Trust tambe ta un oficina di abogado cu ta crea companianan y structuranan fiscal scur, pero cu un gestion familiar.

E ta conta cu oficinanan na paisnan manera Samoa of Saint Kitts & Nevis.

 

  1. Kiko t’e nificacion di dunador di servicionan ‘offshore’?

E buffetnan implica ta dedica na crea structuranan di sociedad compleho pa asina sconde e berdadero beneficiario di algun tipo di pertennecia, logra un miho optimizacion fiscal of te hasta incluso purba di no paga ningun tipo di impuesto.

 

Un sociedad ‘offshore’ ta cualkier entitad huridico crea segun e leynan di un Estado stranhero y cual actividad ta wordo realisa pafor di e hurisdiccion di esun cu e ta registra na dje inicialmente. E termino ta wordo uza pa denomina e empresanan crea den un paraiso fiscal, manera Aruba, unda cu nan no ta hasi ningun actividad comercial y tin carencia di empleado.

Di e manera aki nan ta probecha di e bentahanan fiscal y e secrecia di e pais.

E beneficiarionan tin e posibilidad di oculta nan identidad y consecuentementemente no declara esaki na e departamentonan encarga cu control fiscal, pa asina evita di paga impuestos.

For di aki ta unda ta uza e termino ‘sociedad pantaya’ pa describi tipo di companianan asi, como cu nan unico finalidad ta di oculta e doño berdadero dueño di un patrimonio.

N’e sombra di e companianan aki por haya hefenan di estado, politiconan, narcotraficante y criminal di tur parti mundo.

 

  1. Y e 19 registronan? ¿Ki tipo di informacion nan ta contene?

E filtracion ta inclui seis miyon di documento procedente di e registronan mercantil di 19 hurisdiccionnan scur, teritorionan considera como paraiso fiscal den alguna di e listanan internacional elabora al respecto.

Independientemente di e pais unda cu nan ta radica, e sociedadnan ‘offshore’ hopi biaha ta wordo uza pa sconde e doño real di algun patrimonio, evita e pago di impuesto of elabora eskemanan fiscal transnacional cu resulta den un carga fiscal menor rib’e e resultadonan di empresanan grandi.

E documentonan administrativo aki ta contene informacion rib’e accionistanan, administradornan y representantenan legal di e companianan aki.

 

  1. Pero e registronan mercantil aki no ta publico?

Na Reino Uni, Bulgaria y Dinamarca, pa pone algun ehempel, si. Pero den e caso di Bermuda, Malta o Aruba ta considera hurisdiccionnan secreto. Esaki ta nifica cu, nan registronan mercantil no ta cumpli cu e rekisitonan minimo di accesibilidad y publicidad.

E informacion lo por ta di pago of restringi na eleccion di su administradornan.

Segun e indice Open Company Data, cu ta analisa e nivel di publicidad di e registronan mercantil den funcion di su accesibilidad, gratuidad y otro variabel, ningun di e 19 registronan mercantil di e Paradise Papers ta cumpli cu por lo menos mitar di e rekisitonan pa wordo considera publico. Pa ta mas concreto, casi ningun di nan ta cumple cun’e.

 

  1. E uzo di sociedadnan ‘offshore’ y trust ta ilegal?

No, e ta legal tantem cu e delaster beneficiario declara esakinan na e autoridadnan fiscal di su respectivo pais.

Segun un estudio di Banco Mundial, “e gran mayoria di casonan di corupcion, financiacion di terorismo, labamento di placa y fraude, e vehiculo corporativo (nan por ta companianan, of cualkier otro tipo di structura) ta wordo uza pa sconde e identidad di esnan involucra den corupcion.

 

E uzo di e tipo di instrumentonan aki tambe ta conta cu un impacto directo rib’e rikeda di e paisnan.

Segun e calculacionnan di e economista Gabriel Zucman, empresanan multinacional ta re-distribui artificialmente rond di 600.000 miyon di euro cada aña uzando e paraisonan fiscal.

Segun e calculonan di Zucman, 10% di e riquesa mundial ta wordo oculta den hurisdiccionnan secreto. Pa mengua e deficit di ingreso aki, e Estadonna tin na nan disposicion dos tipo di politica: e subida di impuesto –cu ta afecta riba tur cos esnan cu no ppr permiti nan mes di conta cu e instrumento di scondemento na paraisonan fiscal– of e recorte di e gasto publico.

 

  1. Loke cu Appleby ta locual cu Mossack Fonseca tambe tabata hasi cu a sali publica den e Panama Papers?

Mossack Fonseca y Appleby ta proporciona servicionan ‘offshore’ na nan clientenan, pero den diferente nivel.

Mientras cu esun prome ta dedica exclusivamente n’e constitucion di sociedadnan, e di dos ta incorpora e planificacion fiscal den su catalogo di servicionan.

Ademas, e dos firmanan no ta rib’e mesun nivel.

 

E clientenan di Appleby ta principalmente esnan cu tin fortunanan grandi y empresanan multinacional. Su manera di opera ta hopi mas compleho den comparacion cu firma di Panama.

 

Appleby di su banda, tin un reputacion y recursonan hopi mas halto cu esnan di Mossack Fonseca, ademas di diversifica su oferta pa loke ta trust funds y fondonan di inversion, vehiculonan hopi comun den e gestion di patrimonionan grandi.

 

  1. Cua t’e diferencianan entre e investigacion aki y esun di e Panama Papers?

Si Mossack Fonseca tabata e bar n’e skina, Appleby ta un restaurante di tres streya Michelin.

Pa loke si e Panama Papers e permiti pa detayenan specifico di e funcionamento basico di e mundo ‘offshore’ keda conoci pa prome biaha, Paradise Papers ta bay un stap mas leu y ta bay mas aden den e mundo di planificacion fiscal. Revelanado un sistema hopi compleho pa reduci of simplemente no cumpli cu obligacionnan fiscal, specialmente di parti e fortunanan grandi y e empresanan multinacional mas importante. E investigacion aki ta laga descubri con proceduranan ilegal ta bira lega, incluso den e caso di oficinanan prestigioso cu ta sigura di cumpli cu e standars di control di mas halto, manera t’e caso di Appleby.

E Paradise Papers a benta un muraya di scuridad abou di no menos cu 19 registronan mercantil na cual no por a accede prome. E informacion aki, cu e ICIJ a publica den su website ayera, lo keda na disposicion di e ciudadanonan y di e autoridadnan di cada pais.

 

Leave a Reply

Top