Parke Arikok

Demostrando nan solidaridad pa cu nan colega

Tur trahador di Parke Arikok a pone trabao abao den fin di siman

Lo sigui haci esaki, te ora haya garantia cu tin seguridad pa tur trahador


Sra. Magali Brito, Secretaria General di SEPPA tabata na Parke Nacional Arikok, despues cu e trahadornan a pone trabao abao, pasobra despues di e atraco riba un colega, nan a keda preocupa.

Por sinti cu tin emocion tras di loke a sosode na parke.

Ta un berdadero lastima y ta un problema cu a bin ta papiando cu gerencia for di hopi tempo y aña pasa a busca manera pa cambia e orario di trabou haci’e mas laat, ta un di e puntonan cu a pone mas enfasis riba dje.

E trahadonan for di e tempo ey a tuma e posicion cu no ta bay over na cambio di orario. Por mira claramente cu trabaonan a sigui normal, pero ora ta trata asunto di placa, esey ta haci cu e persona encarga ta keda mas laat cu lo usual mirando cu tin contamento di placa.

Lamentablemente cu loke a sosode diabierna ultimo, tabatin sin presencia di seguridad y esey tabata un di e exigencianan di e trahadornan diasabra mainta a bolbe demanda.

E trahadornan a bisa e dirigente sindical, si no tin garantia pa cu seguridad, nan lo pone trabao abao.

Ta dificil pe hendenan aki por funciona n’e momento aki, unda tin un preocupacion grandi.

SEPPA a sostene e trahadornan di Parke Arikok den nan accion y ta spera cu e siman aki, por tin claridad di parti di Directiva, kico nan ta pensa di haci.

Naika Weller, kende tambe ta cashier na Parke Nacional Arikok y a conta di un situacion caminda cu e trahadonan ta preocupa. Weller a conta cu diabierna atardi na cas via di un groupchat y un colega a manda mensahe cu tin un atraco a sosode riba e Head Cashier y esey no a cay den bon tera.

Naika Weller mes personalmente ora cu a wak e potretnan via social media, a tok’e hopi di cerca.

E falta di seguridad cu tin pa ora cu tin cu sera pa bay cas no tin at all. Esey t’e motibo cu e trahadonan ta hopi disgusta y a bay den accion.

Varios dia ta ser papia cu lo bay tin instalacion di camara, pero ainda nan ta bibando den un pais cu constantemente tin un atraco.

Nan ta traha y pensa cu nunca lo tin un atraco na Parke Arikok, pero nan ta equiboca.

Diabierna ora cu el a toca nan colega Gina, a bira un momento pa para un rato keto pa mira ki solucion por bin a corto plazo, pasobra no por keda traha asina.

No tin ningun tipo di seguridad den ningun tipo di forma. E trauma cu e colega ta aden aworaki, Naika Weller no kier pasa aden y tampoco pa su coleganan. Pesey nan ta exigi un solucion a corto plazo tocante e situacion aki.

Por conclui cu loke a sosode cu colega Gina, e atracadornan aki lo tabatin nan na bista pa basta dia caba.

Y diabierna atardi tabata un dia keto. E mes a bay cas cu un colega, mientras cu Gina a keda su so atras. No por!!!

Como hende muher, bo no por ta bo so. Un biaha mas, e suma aworaki ta di menos cu loke a sosode. .

Weller ta kere cu mester bin un otro sistema di maneho pa garantiza seguridad. Directiva tambe tin cu yuda den e parti aki. E trahadonan por bin cu idea, pero nan mester di e sosten di directiva.

Nakia Weller a bisa cu directive kier pa bo duna 100% di servicio, pero si no tin un seguridad, bo no por funciona. Bo kier duna un servicio berdad, pero como trahador tambe mester di seguridad su tras. No por duna so anto bo mes no ta ricibi nada, Weller a bisa por ultimo. Palabra awor ta na Directiva di Parke Arikok.

Top