Parlamenatrio Dangui Oduber (MEP): Benny Sevinger y Mike Eman debe pueblo splicacion dicon NEGOSHI ta wordo haci cu e proyectonan Green Corridor y Watty Vos Boulevard!

Ta parce cu pais Aruba NO tin Gobierno. Benny Sevinger y Mike Eman ta invisible, nan no ta contesta preguntanan di Parlamento, nan no ta atende rueda di prensa y no ta atende cu preocupacionnan di pueblo.

Un Prome Minister invisible asina aki manera Mike Emam a crea caos y desorden den nos pais. Corupcion na Aruba a yega na un nivel nunca antes bisto, segun Dangui Oduber.

 

Pueblo di Aruba y seis futuro Gobierno a wordo comprometi cu e proyectonan PPP Green Corridor y Watty Vos Boulevard cu lo costa e pagador di belasting casi 700 miyon florin. Nos a informa e pueblo aki cu negoshi ta wordo haci cu e proyectonan aki y tur dos proyecto a wordo bendi.

E bid pa Green Corridor a wordo gana pa Odinsa, nan a bira bende e proyecto cu Mota Engil y na su turno Mota Engil a bende e proyecto cu Infrared. E otro proyecto Watty Vos Boulevard ta mesun cos.

Mota Engil ta esun cu a gana e bid pa e hecuta esaki y a bira bende su stakes cu Infrared. Kiermen e compania Infrared cu ningun hende na Aruba a tende di dj’e ta esun encarga awor aki pa ehecucion di ambos proyecto, sr. Oduber ta splica.

 

Loke pueblo kier sa ta cuanto miyones di florin a wordo strika den e deal aki? Kende ta esnan cu ta cobrando placa bao mesa cu tur e deal strañonan aki? Unda Mike Eman mes ta? Mi ta reta Mike Eman pa bin dilanti y duna cuenta na pueblo, pasobra placa di pueblo no ta cos di hunga cu ne! Mike Eman mester stop di sconde y duna nos hendenan un splicacion kico ta pasando den e proyectonan PPP, e Parlamentario di MEP ta mustra.

 

E unico motibo pakico un otro compania ta tuma e proyecto over ta pasobra e lo saca ganashi y balor rib’e proyecto. Kiermen na final di dia fiesta ta wordo haci cu laca di pueblo pa multinationals traha miyones di florin riba custia di e pueblo aki pa despues e miyones aki wordo reparti den e grupito di “friends with benefits” di AVP.

Tin un famia aki na Aruba a bira multimiyonario cu negoshinan di tereno y tambe negioshi di Green Corridor. Ta un abuso loke ta wordo haci cu fondonan publico. Mike Eman a abusa di e fondonan aki pa yuda y enrikece su hendenan, sr. Oduber ta continua bisando.

 

Con por ta posibel tin Ministernan di e Gabinete actual tin condominium na Miami. Di unda e placa aki a bin? E Afpakteam cu tin na Aruba lo haci un investigacion cerca e Ministernan pa wak di unda tur e placa ta bin? Con ta hustifica asina tanto luho? Acaso e salario di Minister ta asina halto cu ta permiti asina tanto luho?

Un cos ta sigur, tur Minister di e Gobierno aki lo mester wordo investiga, pasobra malversacion cu fondonan publico ta castigabel y e Gobierno aki no por kere cu nan lo scapa cu tur e bagamunderianan cu nan a haci, sr. Oduber ta enfatisa.

 

E pais aki mester un Gobierno drechi di hendenan responsabel cu ta gasta cada florin di e pagador di belasting na un manera responsabel. E pais aki mester un Gobierno integro caminda gobernantenan no ta mira Gobierno como un negoshi sino un vehiculo pa yuda e pais aki progresa.

Nos partido ta cla pa asumi responsabilidad y nos lo percurra pa stimula economia, crea empleo, combati criminalidad y percura pa nos tin un turismo solido y duradero caminda turistanan di berdad ta bin nos pais pa gasta placa, Dangui Oduber a duna di conoce.

Top