Parlamentario Andin Bikker: Minister Arthur Dowers no por laga traha ni sikiera un rijbewijs drechi

No mucho tempo pasa varios famia a haya nan den gasto adicional durante vakantie pa via di e mal maneho di Minister di Husticia, mr. drs. Arthur Dowers, ya cu e rijbewijs blanco cu tabata wordo emiti temporalmente bou su responsabilidad no tabata wordo reconoci den exterior pa huur of core auto.

Awor a bin resulta cu e rijbewijsnan cu a wordo emiti desde 2015 bou su responsabilidad como Minister tampoco a wordo traha conforme ley y rekisitonan di seguridad, Andin Bikker a señala.

 

Como 1500 rijbewijs p’e motibo aki no ta wordo consdera valido pa vota pasobra e datonan capta riba e rijbewijs no ta cuadra cu e informacion oficial na Censo.

Pues atrobe miles di ciudadano ta wordo afecta dor di e mal maneho di e Minister di Husticia actual.

E hecho e rijbewijsnan menciona tin datos robes riba nan ta pone cu e determinacion di identidad corecto di un persona ta wordo dificulta y e confiansa den rijbewijsnan oficial emiti dor di pais Aruba ta wordo afecta severamente.

 

Di acuerdo cu Andin Bikker, e responsabilidad pa traha y emiti documentonan di identificacion ta algo hopi serio ya cu ta documentonan cu tambe ta wordo usa internacionalmente y mester cumpli cu rekisitonan di seguridad.

Na Hulanda dos mandatario mester a tuma nan retiro den un caso similar conoci como e “Paspoortaffaire”.

 

Aki na Aruba so Ministernan di AVP ta keda pega barco y e fraccion di AVP ta keda bati man comosifuera nada no a pasa.

Pesey dia 22 di september benidero pueblo lo por huzga pa su mes e mal maneho di e Gobierno actual y trece un cambio cu e derecho di voto.

 

Segun Andin Bikker: “Nos di POR, Plataforma E Forsa Nobo, ta cla pa trece cambio positivo den Gobernacion di Aruba, cu sosten masal di pueblo esey mester POR!”.

 

 

Top