Parlamentario Andin Bikker: ”Pueblo tin necesidad pa flexibilisa e edad di pensioen”

Diferente ley a keda trata den Parlamento e siman cu a pasa y un cu a capta atencion t’esun cu ta regarda un grupo grandi di ex-empleadonan di SETAR cu a hiba un lucha tenaz contra Gobierno di signatura di zowel MEP como di AVP, cual lucha a dura 14 aña pa nan por haya nan derecho y a costa nan of nan sindicato miles di florin na gastonan legal.

Parlamentario Andin Bikker a felicita e ex-pensionadonan cu a logra pa haya loke nan tin derecho riba dje despues cu nan a haya tanto contratiempo di Gobiernonan di e partidonan tradicional.

 

Pa loke t’e amienda cu partido MEP a presenta pa aumenta e suma di pensioen respectivamente pa pareha y soltero, y tambe baha e edad di pensioen na 62, Parlamentario Andin Bikker a splica cu el a sostene e amienda aki paso den eleccion pasa durante un encuesta cu e corant Amigoe a tene, e tabata e unico Parlamentario cu a declara cu e no ta na fabor pa bay hisa edad di pensioen.

 

Bikker a hasta propone na 2014 pa bin cu un opcion di pensioen flexibel caminda e pensionado ta dicidi si e ta bay cu pensioen ya na edad di 60 mes.

E tempo ey Gobierno di AVP a pidi pa warda cu e amienda cu Bikker kier a introduci ya cu nan a keda di sinta cu e gremionan dentro di 6 luna p’asina tene un evaluacacion di edad di pensioen. Entretanto nos ta par di aña mas leu y Gobierno no a sinta cu ningun gremio mas riba e edad di pensioen.

 

Parlamentario Bikker ta constata cu ta un hecho cu mester flexiblisa y baha e edad di pensioen y e Plataforma POR, e Forsa Nobo, di cual e ta forma parti pa e eleccion benidero kier bay mas leu ainda cu MEP den esaki, ya cu POR kier reduci e edad bek na 60 a base di e pensioen flexibel cu Bikker a propone na 2014 y tambe aplica e concepto di ”deeltijdpensioen”, cual lo brinda e pensionado e oportunidad di traha un parti di dia y alabes goza di su pensioen.

Parlamentario Bikker ta sinti cu aki na Aruba tin e necesidad pa un tipo di pensioen asina.

 

Specialmente den sectornan caminda e trabou ta fisicamente hopi pisa, manera e.o. e sector hotelero y e sector di construccion. Esaki ta un desaroyo cu por constata na Hulanda tambe unda cu partidonan politico durante e ultimo eleccion a hinca den nan programa di partido e necesidad pa flexibilisa e edad di pensioen.

 

Top