Parlamentario Chris Dammers (AVP): Placa di pueblo den gobernacion di AVP a bay pa pueblo y ningun otro caminda

For di 2009 te cu awe, Aruba a pasa den un di e desaroyonan mas impresionante cu e pais a conoce desde introduccion di Status Aparte na 1985, caminda practicamente den tur bario, por a mira cambionan tumando lugar.

Un programa di gobernacion di partido AVP, cu a wordo formalisa cu participacion di practicamente tur grupo den comunidad, a percura pa cambionan grandi, cu den tempo di un di e pio crisisnan economico mundial, Aruba a logra di mantene cabes riba awa a base di un vision di partido AVP.

 

Chris Dammers, miembro di fraccion di AVP den Parlamento, ta mustra cu no solamente a y ta ehecutando un vision caminda tur grupo den comunidad ta forma parti di dje, pero na mes momento e seriedad pa drecha e situacion delicado cu Gobierno di MEP a laga e pais aki aden, a percura p’e progreso cu tur hende por mira tur rond di Aruba.

“Nos pueblo ta mira e cambionan aki, nos hendenan ta mira e desaroyonan aki, cu pa 8 aña ta den ehecucion, pa hisa e calidad di bida den tur bario, pa nos hendenan sinti cu nan ta parti di e desaroyo aki, na lugar di ta parti di un grupo grandi cu a mira solamente un grupo di famia y amigonan di Gobierno di MEP probecha.

 

Proyectonan grandi a wordo ehecuta y ta den ehecucion, entre otro e waf di carga cu a move pa Barcadera y habri caminda pa waf di Oranjestad ser transforma den un centro di turismo crucero cu nunca antes nos a conoce.

E transformacion di centro di Oranjestad, caminda a percura pa drecha nos centro y converti esaki den un centro turistico caminda nos pueblo tambe por gosa di dje y duna comerciantenan un centro mucho mas atractivo pa haci negoshi.

 

Den tur bario rond di Aruba, por mira cambionan a tuma lugar, inversionnan cu a ser haci, un hospital cu a wordo drecha pa un mihor cuido medico y un sector di turismo cu ta sigui mira adelanto keto bay.

Nos por papia di un desaroyo na San Nicolas cu ainda no ta cla y caminda tin hopi ainda pa haci, pero cu a mira un alivio grandi cu e proceso di reapertura di e refineria cu lo percura pa hopi cupo di trabou.

 

Pueblo tambe por mira y conoce di serca e inversionnan miyonario cu a wordo haci den enseñansa caminda mas cu 80 scol a conoce cambionan y entre nan algun scol nobo cu a wordo construi y ta algo cu sin duda tabatin mester.

Un adelanto grandi riba e tereno aki ya cu Gobierno di MEP a para mira scolnan deteriora, laga plafond di scol cay riba muchanan, laga edificionan decai di tal forma, cu el a bira un peliger pa bienestar di nos muchanan.

 

Awe pueblo por mira tur e cosnan aki, tur e cambionan aki, nan por mira di serca unda placa di pueblo a bay, nan placa cu nan ta traha p’e.

A inverti miyones den bienestar di nos hendenan, caminda Gobierno di AVP e.o. a percura for di 2009 pa yuda esnan di menos entrada, alivia e peso di nan gasto cu entre otro cu ‘reparatie toeslag’, placa di scol, aumento di onderstand, aumento di pensioen, aumento di salario minimo, aumento di e asina  yama ‘normatieve uitkering, aumento di familielid bijslag, aumento di schoolkindertoeslag,  aumento di ‘eenmalig schoolgeld uitkering’ y otro forma di ayudo caminda cu  Gobierno di AVP a percura pa placa di pueblo, bay bek pa pueblo.

 

Lo ta na su lugar pa lider di MEP, Evelyn Wever Croes, bin mustra pueblo na unda 28 miyon cu pueblo a paga na huurmento di edificio di famia y amigonan di MEP, a bay y den cual saco esakinan a bay,” Parlamentario Chris Dammers ta mustra.

 

 

 

Leave a Reply

Top