Parlamentario Chris Dammers: Green Corridor den su pleno ehecucion finalmente lo percura pa un mihor infrastructura y seguridad den nos trafico

 

Durante e ultimo aňanan, desde 2010, hopi trabou ta tumando lugar tur rond di Aruba caminda cu nos ta experienciando un remodernisacion completo di nos careteranan principal, diferente edificionan, nos centronan di ciudadnan, barionan, hospital, etc.

Hopi esfuerso ta wordo haci pa reconstrui pais Aruba y tene nos econonomia riba awa, despues di un caida grandi di alrededor di 15% den aňanan 2008 pa 2009 cu Gobierno di MEP pa motibonan di mal maneho, falta di vision y pa pone prioridadnan familiar riba pueblo, cu placa di pueblo, segun Chris Dammers di AVP.

 

Gabinete Mike Eman I cu sosten y aprobacion di e fracion di AVP den Staten den nos afan pa mehora e infrastructura di Aruba y e calidad di bida di nos hendenan a cuminsa ehecuta e plan ambicioso BoAruba asina cu nos a sinta na november 2009.

Unda cu bo bira bo ta mira trabounan di construccion y restauracion ta tumando lugar te cu dia di awe.

Un di e proyectonan di mas grandi di BoAruba y den historia di pais Aruba t’e “Green Corridor” cu t’e vierbaansweg di Playa pa San Nicolas y vice versa. E nomber “Green Corridor” ta papia pa su mes.

E intencion keto bay cu ta aplicando ta pa dun’e un asercamento “berde”, banda di proteha y mantene tanto naturalesa como medio ambiente y pa haci e proyecto uno duradero tambe.

 

E caminda aki lo percura sigur pa soluciona e problema di trafico cu tin actualmente y pa tin un miho acesiblidad pa San Nicolas, Seroe Colorado y Barcadera, banda di un mehoracion total den e seguridad di trafico.

E mehoracion di e infrastructura lo percura pa un desaroyo economico pa cu e parti pariba di brug y tambe e proyecto aki a facilita e mudamento di e waf di container y Free Zone pa Barcadera. Asina lo tin un mihor decentralisacion di actividadnan economico cu un infrastructura aceptabel, Chris Dammers a sigui splica.

 

E concepto aki banda di tur e otronan cu a wordo discuti ta duna prioridad grandi na mantencion y proteccion di naturalesa y tambe ta creando espacio pa recreacion p’e comunidad local.

Ta pesey mes nos lo bay mira cu banda di e vierbaansweg lo bin cu camindanan pa core bais, lusnan cu ta traha riba energia duradero y un landscaping atractivo.

E proyecto Green Corridor den liñanan grandi ta ensera e ampliacion di e capacidad di e caminda principal existente for di Aeropuerto te cu e rotonde di Pos Chikito pa un caminda di dobel via (2×2) riba un distancia di 8 km, cual proyecto ta den pleno construcion cu un brug nobo n’e cruzada di Spaans Lagoen.

 

E caminda existente di e rotondo di Pos Chikito pa San Nicolas den e cuadro aki tambe lo wordo reconstrui p’asina e trafico tin mas posibilidad banda di e caminda principal. Esaki dor di stimula uso di e ruta nort y zuid.

E ruta nort – cu ta bou pleno construccion y casi cla – ta bay via Jara, Savaneta, Sero Alejandro, Rooi Kochi, Mabon, Brazil, Weg Seroe Blanco y Weg Fontein y drenta San Nicolas.

E ruta zuid ta core mas tanto banda di e costa. For di Isla di Ora e caminda aki lo core via Savaneta, Noord Cura Cabay, Zeewijk y asina drenta San Nicolas, ya ta den preparacion.

Aki ta trata di un upgrading di camindanan existente riba un largura di mas o menos 16 km.

 

Pa por tin un mihor entrada cu e waf di Barcadera y e Free Zone ya a laga pone un turbo rotonde n’e caminda grandi cu ta conecta e caminda nobo cu ta bin di Barcadera cu e caminda principal riba e vierbaansweg.

N’e cruzada di Mahuma y n’e cruzada di Drive Inn tambe lo bin un turbo rotonde pa facilita e fluho di trafico na un manera mas actual y sigur – kitando cruzadanan peligroso cu velocidad halto.

 

Un di e aspectonan agrega cu mester trece dilanti t’e reconstrucion di e pita caminda di rotonde di Pos Chikito pa Isla di Oro den e districto di Pos Chikito. Na ambos banda di e camindanan principal a haci e 2 camindanan di santo cu tabata core dilanti di e casnan caminda di asfalt, drecha cu klinkers dilanti di e casnan y tambe n’e otro banda di e camindanan di asfalt nobo.

E aspecto aki ta trece un mehoracion di bida pa cu e stof cu ta lanta dor di trafico dilanti di na cas y tambe a pone cu awor e casnan aki ta pega na un caminda di asfalt cu ta subi e balor di e casnan.

 

Nos por ta orguyoso di nos profesionalnan cu ta ehecutando e proyecto grandi aki y tambe p’e planning teniendo na cuenta cu gran parti di e careteranan ta keda habri durante di e periodo di construcion, segun Chris Dammers.

 

 

Leave a Reply

Top