Parlamentario Chris Dammers: IMF reconociendo cu Gobierno di AVP a sali di Double Dip ocasiona pa MEP

IMF durante nan ultimo bishita cu nan a caba di haci a sali for di Aruba cu recomendacionnan hopi mas al caso, reconociendo tur e adelantonan cu Gobiernonan di AVP recientemente a logra, pero tambe un finansa publico cu sigur lo yega e meta cu IMF a pone den nan raport di 2015 cu pa 2010 Aruba lo mester purba di yega un surplus di 1.5% den e presupuesto di pais Aruba. Asina so nan a raporta nan 2015 cu nos lo por papia di un finansa publico sostenibel, segun Chris Dammers di AVP.

 

Nan por a mira un finansa publico caminda e deficit di 2014 pa 2017 a baha anualmente di 9.4% (pa por a saňa e fondo di APFA) na aňa 2014 pa un deficit di 2% na 2015 y respectivamente di 2% pa 0.5% na 2016 y 2017.

Segun e calculacionnan cu e meta di yega un surplus na aňa final 2018 di 0.5%. Cu e resultado aki IMF ta mira cu sigur den un periodo di 2 aňa Aruba lo mester por subi e surplus aki cu 1% mas pa final mester yega e ‘benchmark’ di IMF di 1.5% na final di 2020.

Esaki sigur, mirando e seriedad cu Gobierno a bin ta kere den nos profesionalnan, nos por relata cu IMF a keda contento cu Gobierno di AVP a sabi di saca Aruba di un double-dip cu nos a conoce na 2009, caminda Gobierno di MEP na mando a e tempo ey a kibra e GDP di pais Aruba cu 15% y a manda desempleo e tempo ey te na alrededor di 12%.

 

Tambe IMF por mira cu tin un structura financiero gubernamental ‘in place’ cu ta funcionando, caminda cu desde aňa pasa tin un presupuesto di pais cu ta wordo entrega e aproba segun nos ley di compatibilidad, banda cu ya desde un 5 aňa nan ey ya cuentanan anual di pais Aruba ta wordo traha, entrega y aproba finalmente dor Parlamento.

Tin awor tambe reportahenan cada kwartal cu ta wordo entrega na Parlamento caminda cu Parlamento den tur esaki tin un mihor bista y control riba nos finansa publico.

 

Di otro banda, maske cu inversionnan grandi a wordo aproba y cu esakinan ta den pleno ehecucion, mester a wak e otro gastonan di acerca caminda den 3 pa 4 aňa mester a frena e crecemento di nos GDP un poco pa por a cumpli cu e normanan di nos deficit.

Gobierno ta keda un di e institutonan cu ta pusha mas placa den nos economia, creando espacio pa extra empleonan. Gobierno t’esun cu finalmente ta inverti mas y ta crea tur espacio social economico y mester haci esaki na un manera responsabel pa por sali bek y paga tur e cuentanan na final di dia.

 

E siman cu a transcuri awor nos por a compronde cu awor ta e instituto di “Fitch Rating” ta haciendo su analisis di e situacion financiero/economico di pais Aruba, pero cu ya na nan yega a felicita Gobierno di Aruba cu e raport di IMF.

Un biaha mas ta keda demostra na IMF cu mientras oposicion ta sigui sembra y plama negativismo cu nan vision y speransa destructivo di pais Aruba, Gobierno ta sigui cumpli cu pueblo di Aruba manera a ser palabra y den tur bario por mira e gran progreso cu ta tumando lugar cu mester sigura nos pueblo un bida mas placentero y progresivo, ing Chris Dammers ta splica.

Top