Parlamentario Chris Dammers: “Lider di MEP ta cuestiona e vision di su propio persona como profesional”

Riba diferente medio social y informativo, por a tuma nota di declaracionnan haci p’e lider di MEP, Evelyn Wever Croes, pa loke t’e vision cu su partido ta bay eleccion cune.

Parlamentario pa fraccion di AVP, sr. Chris Dammers ta mustra cu aki pueblo por ripara e tipo di weganan politico sin sentido, cu e lider di MEP ta sigui insisti pa hunga, sin presenta un solo caminda, e solucion con e ta bay logra na baha edad di pensioen sin hinca e fondo di pensioen den problema serio.

 

“Nos tur por a ripara cu durante 8 aña di gobernacion di MEP for di 2001 pa 2009, ningun esfuerso a ser haci pa fortalece e fondo aki cu a pone cu por poco esaki a bati bancarota.

Nos tin raportnan di institutonan renombra, tanto local como internacional riba e forma con tin cu atende cu e problema serio cu e fondo di pensioen a bin haya su mes aden y aki nos ta papia di institutonan manera Banco Central di Aruba, IMF, Standard & Poors y otro instancianan conoci.

Gobierno di AVP a carga e responsabilidad aki y na 2015 a hinca miyones den e fondonan aki  pa salvaguardia su existencia evitando asina un problema serio p’e fondonan menciona y tur pensionado di nos pais.

 

Pa colmo, un di e consehonan cu mas a pisa e tempo ey y cu ta un vision cu ta data for di 2007, t’esun di e profesional di impuesto, esta Evelyn Wever Croes, kende den un carta dirigi n’e Gobierno di MEP di e tempo ey, a conseha pa aumenta edad di pensioen pa 65 aña, ya cu e ta mira esaki e unico forma responsabel pa salvaguardia existencia di e fondonan aki.

Un conseho cu e profesional Evelyn e tempo ey a manda pa Conseho di Minister di MEP, mirando esey como e unico solucion adecuado pa saca e fondonan aki for di problema mescos cu otro instancianan internacional y local.

 

Kico nos por mira awe, e mesun Evelyn Wever Croes como politico, actuando liña recta contra di su propio vision como profesional dunando speransa na tur hende cu Gobierno di MEP lo bay baha e edad di pensioen bek na 60 aña, pero sin splica for di unda e lo saca e placa aki.

Na mesun momento Evelyn ta splica den su declaracion cu Gobierno di MEP lo kita belasting for di e pensioen di biehes, mientras cu tur pensionado ta bon na altura cu no ta cobra ningun tipo di belasting for di nan pensioen.

 

Aki nos por mira atrobe cu e lider di MEP no ta sincero cu pueblo y tanto su persona como su partido no tin respet pa profesionalnan local cu ta traha duro riba e tipo di asuntonan aki, pa percura p’e mihor solucion cu tin, hasta manera su persona a yega di haci den e posicion di experto di impuesto.

Ta di lamanta cu ta haci politica cu e tipo di promesanan bashi aki mientras cu Evelyn ta bon na altura kico e mes a recomenda Gobierno di MEP haci for di 2007 y si Gobierno di MEP a acepta su recomendacion di e tempo ey, e situacion lo no a bira asina serio manera Gobierno di AVP a bin haya esaki despues,” Parlamentario Chris Dammers a declara.

Top