Parlamentario Chris Dammers: Proyecto di Watty Vos Boulevard lo hiba Aruba na otro nivel di desaroyo economico

 

Fin di siman cu a transcuri a duna e señal pa start cu e “Watty Vos Boulevard” caminda cu tabatin e groundbreaking oficial n’e cruzada di Sasakiweg y Caya di Pos Chiquito, cual ta un di e puntanan di e caretera nobo.

E caretera aki ta cuminsa n’e rotonde di Aeropuerto y ta termina na e cruzada ya menciona. Cu esaki 3 proyecto grandi ta caba di completa otro y ta forma un infrastructura integral pa un desaroyo economico y social pa pais Aruba pa e aňa nan nos dilanti.

 

A cuminsa cu mudamento di nos waf di carga pa Barcadera sacando esaki for di Playa, y asina creando mas espacio pa desaroya e waf di Playa pa actividadnan crucero y otro actividadnan comercial.

Moviendo e waf di carga pa Barcadera mester a zorg e.o. cu e infrastructura di cartera tambe lo ta adecuado pa movecion di e carganan di Barcadera p’e area di hotel, den cual e proyecto di ‘green corredor’ conhuntamente cu e Watty Vos Blvd lo a yuda den e aspecto aki, banda cu nan mester a principalmente mehora e fluho di trafico di San Nicolas p’e area di Playa y Hotelnan.

 

Chris Dammers ta splica cu a cuminsa traha un caretera pa conecta e area di Balashi cu e caminda di Playa pa San Nicolas na altura di Seroe Thijshi, cual caretera di 4 via ya ta cla (Green Corridor fase 1).

A continua despues –  ya mas cu un aňa pasa – cu e Green Corridor fase 2 cu ta encera e ampliacion di e capacidad di e caminda principal existente for di Aeropuerto te cu e rotonde di Pos Chikito cu un caminda di dobel via den ambos direccion (2×2) riba un distancia di 8 km, cual proyecto ta den pleno construccion cu un brug nobo na e crusada di Spaans Lagoen.

 

E caminda existente di e rotonde di Pos Chikito pa San Nicolas den e cuadro aki tambe lo wordo reconstrui p’asina e trafico tin mas posibilidad banda di e caminda principal. Esaki dor di stimula uzo di e rutanan panort y pazuid di e caminda principal.

E ruta panort – cu ta bou pleno construccion y casi cla – ta bay via Yara, Savaneta, Sero Alejandro, Rooi Koochi, Mabon, Brazil, Weg Sero Blanco y Weg Fontein y drenta San Nicolas.

E ruta pazuid ta core mas tanto banda di e costa.

For di Isla di Ora e caminda aki lo core via Savaneta, Noord Cura Cabay, Zeewijk y asina drenta San Nicolas, ya ta den preparacion.

Aki ta trata di un ‘upgrading’ di camindanan existente riba un largura di mas o menos 16 km.

 

E proyecto di Green Corridor caminda cu e nomber ta papia pa su mes lo mantene hopi areanan berde contrario n’e proyecto di Watty Vos Blvd.

Cu e proyecto di Watty Vos Blvd cu a inicia awor nos ta papia di un proyecto cu ta encera solamente un caminda di 4 via cu ta sali for di Aeropuerto bay Sasaki, pero cu tambe ta alivia e trafico na Playa, mirando cu trafico  rumbo pa e area di hotel desde Aeropuerto no mester bay pasa den Playa mas.

Tambe e ta drecha e caminda di Oranjestad pa Ponton, drecha e actual caminda di Sasaki te na Super Food, bay bek na Blvd bieu for di unda tabata ex Fatum te na Riu.

Den esaki ta sigui cu e Linear Park, conectando esaki nan riba e parti di linear parknan cu tin caba na Playa. Tur esaki ta consisti di 5 fase.

 

E proyecto aki t’esun mas grandi di infrastructura, cu no solamente ta cambia infrastructura, pero tambe calidad y seguridad di bida di e habitantenan y nos bishitantenan cu ta frecuenta Aruba.

Principalmente si mira cuanto hende ta uza e caminda aki den fin di siman pa haci ehercicio. Tambe tin conexionnan nobo, entre otro rotonde y fly-over, cu lo percura pa trece seguridad y un mihor fluho di trafico.

E proyecto aki ta inclui un linea pa bicicletanan, cu lo core for di Boulevard, pasa den Watty Vos Blvd, drenta e caminda di 4 via te na San Nicolas.

E lo percura pa hopi mas movecion di ciclistanan riba e camindanan aki, algo cu Gobierno ta promove pa mantene e ciudadanonan den un estado saludabel.

 

E proyecto aki lo wordo ehecuta dor di e compania Mota-Engil cual t’e empresa cu a gana e destaho publico y lo wordo financia bou di un consorcio di diferente banconan. Watty Vos Blv ta un proyecto un poco diferente cu e Green Corridor, cu tin hopi zona berde na banda di caminda. Watty Vos Blvd ta pasa den diferente bario y e areanan na banda cu lo wordo desaroya economicamente.

Gabinete Mike Eman I cu sosten y aprobacion di e fraccion di AVP den Staten – di cual Chris Dammers ta bisa di ta hopi orguyoso di ta forma parti di e fraccion di AVP desde 2009 – asina un bes mas ta cumpliendo pa mehora e infrastructura di Aruba y e calidad y siguridad di bida di nos hendenan cu e plannan aki.

 

Top