Parlamentario Chris Dammers Turismo pa Aruba a reacciona positivamente pa locual ta mercadonan clave AVP mustrando con ta hiba pais dilanti!

E momento a yega pa partidonan den oposicion, habri wowo y reconoce e realidad di un Gobierno di AVP, cu ta goberna pa bienestar di nos pueblo, pa futuro di e interes general di e pais, Parlamentario Chris Dammers ta mustra.

“Ya desde 2015 ATA debidamente ta trahando cu 2 estadisticonan, esta esun cu ta inclui e turistanan Venezolano y e otro cu ta exclui e turistanan Venezolano, simplemente pa bo no bay gaña  mes ariba un grupo di turista extra Venezolano cu ta bin nos pais pa negoshi di raspa dolar y bay bek.

Sinembargo semper nos a bisa cu bo tin un grupo solido di un alrededor di 180.000 turista Venezolano cu ta bin nos pais y ta gasta te hasta mas cu un turista den averahe. Pero dor e gruponan extra cu e ultimo 2 aña nan tabata bin Aruba nos tabata surpasa 300.000 turista Venezolano cu awor ta normalisando bek.

 

Si tuma e caida drastico cu ta tumando bek awe desde aña 2016 den e turistanan Venezolano – cu poco pa poco ta normalisando bek na cifranan di 2014 – ATA, conforme cu locual nos a discuti cu nan den Comision di Turismo di Parlamento na final di 2016, mester a injecta sumanan extra di mercadeo na un total di Afl. 4 miyon pa aňa 2016, di cual 2 miyon a wordo inyecta den e ultimo kwartal di 2016.

E frutanan di e injeccionnan extra aki nos por a mira directamente na final di aňa 2016, y ainda ta mirando esaki pa cu e luna di januari 2017, cu e siguiente cifranan, segun Chris Dammers.

 

Nos ta mira cu pa luna di januari – si compara 2016 cu 2017 – un subida substancial den e mercado di Merca cu un subida di 8.4%, mientrastanto cu Canada a subi cu 13.7% y Europa a subi cu 3.5%. Merca siendo nos mercado principal di semper.

Tourism Receipt pa 2016 calcula dor di Banco Central di Aruba lo sali mas of menos na luna di maart 2017, sinembargo nos por wak cu pa locual t’e prome 9 lunanan di 2016 esaki tabata $ 1.23 biyon cual ta un reduccion minimo di 0.4%. Parti di esaki ta relaciona n’e piek di turistanan Venezolanonan cu a bin den gran cantidad na 2015 cu a wordo reduci basta pa 2016, si nos compara e mesun 9 lunanan di 2016 cu 2015.

 

Igualmente si compara e lunanan di januari di 2016 cu 2017 nos por mira cu e REVPar a subi solido cu 9% di US$ 235.30 pa 256.48. E Average Room Occupancy a subi di 79.2% pa 84.9%. Pa locual t’e Average Daily Rate nos por wak cu esaki a subi tambe di US$ 296.93 pa US$ 302.22.

Pa locual t’e targetnan pa aña 2017 ATA a stipula e siguiente metanan nan dilanti:

Pa locual t’e pasaheronan cu ta bin y keda cu transporte aereo ta pronosticando un crecemento di 1.0%;

Pa locual ta placa cu turistanan ta laga atras den nos economia ta pronosticando un crecemento di 1.0%;

Pa locual t’e “Revenue per Available Room” nos lo bay wak un crecemento di 3.5%;

Pa locual ta nos turistanan crucero nos por verwacht e aňa aki un crecemento di 5%.

 

Ta decisionnan cu ta sigui refleha e maneho cu Gobierno di AVP a bin ta ehecutando a base di su programa di gobernacion cu pueblo a sostene na 2013 caminda e prosperidad comparti, ta esencial den e maneho aki,” Parlamentario  Chris Dammers a declara.

 

Leave a Reply

Top