Parlamentario Chris Romero (MEP): E gran necesidad pa un inversion den personal di enfermero na hospital di Aruba

Segun informacion cu nos ta dispone di dje, ta bisa nos cu na hospital falta un cantidad di mas o menos 25 verpleegkundige.

Esaki ta nifica cu e cantidad limita di personal cu tin disponibel pa atende y cuida nos comunidad na hospital t’asina limita cu ta comun p’e personal draai shiftnan demasiado largo, poniendo asina presion riba e calidad di servicio medico y te hasta nan mesun salud, segun miembro di MEP, Chris Romero.
E aña aki un bes mas e placa di presupuesto di pais Aruba destina pa hospital, lo ta significativamente menos compara cu aña pasa, strobando asina atrobe e proceso pa busca mas personal pa traha y atende cu pacient.

Structuralmente e presupuesto di hospital ta keda bira menos den e ultimo añanan, causando un decadencia inmediato den e cuido medico na Aruba.

Nos por pensa cu teniendo un Minister di Salubridad cu ta un dokter activo, su prioridad lo ta pa hospital brinda un servicio optimal na su pacientenan, pero lamentablemente nos por realisa cu esey no t’e caso, Chris Romero a sigui denuncia.

 

“Nos mester compronde bida di un ser humano no por tin prijs y salud ta algo cu no por menosprecia. Mescos cu ora ta toca na un famia di nos, nos kier p’e haya e mihor cuido posibel, mescos nos tin cu duna e personal di hospital cu ta duna e cuido aki na nos sernan keri, e material necesario pa nan por haci nan trabou manera mester ta.

Ta hopi facil critica sin sa e factornan cu ta hunga un rol den e proceso di cuido di un pacient, pero te ora cu nos sa e realidad di kico ta come y bebe den e ambito di enfermería na hospital, e ora nos lo por compronde e realidad”.

 

Preguntanan cu Chris Romero tin pa Minister di Salubridad y na AZV ta:

Cuanto dokter falta y den ki ramo di specializacion? Cuanto verpleegkundige falta y den ki nivel (MBO/HBO)/specializacion?

Cuanto personal falta den departamentonan di Medische ondersteuning? Kico t’e motibo cu ta baha e presupuesto pa hospital cada aña?

Ideal ta pa nos por tin un raport cu tur e informacionnan aki p’asina den termino corto y termino largo nos por sigura y haci tur lo posibel p’e hospital cu nos tin draai optimalmente.

 

Ki bal tin edificionan nobo y aparatonan medico moderno, pero e personal mes no tin e prioridad cu mester serca Gobierno, y especialmente un Minister cu sa mihor ki e necesidadnan di nos hospital ta.

MEP no ta contra e renobacion di Aruba su hospital, pero sigur MEP ta mira inversion den personal como prioridad, segun Chris Romero.

 

Top