Parlamentario Chris Romero (MEP): Mester tin un focus den construi scol nobo y no solamente renobacion di edificio escolar

Un di e puntonan alarmante cu tin den nos enseñansa t’e fenomeno di klasnan grandi. Esaki ta trece como consecuencia cu e calidad di enseñansa pa cada un di e muchanan ta baha.
Algo cu tambe ta bin aserca ta cu lo pone un presion enorme riba e maestronan. No solamente e ta un presion p’e maestronan, pero tambe p’e studiantenan y mayornan cu eventualmente lo tin di bay atende scolnan leu di nan mesun bario di residencia, pa falta di acomodacion.

P’e motibo nos ta kere cu ta esencial pa, no solamente renoba e scolnan existente, pero tambe traha scol nobo y asina baha e cantidad di studiante p’e yega na ta uno cu e maestronan por carga, segun Chris Romero di fraccion di MEP.

Naturalmente lo mester di mas maestro y asistente den klas p’e scolnan extra cu lo bin. Lo mester busca forma pa encurasha nos hobennan pa sigi nan estudio sea ta na IPA of den exterior, pa cumpli cu e vacaturanan cu lo habri n’e scolnan nobo.
Lo ta necesario pa haci un estudio cu lo sondea e posibilidadnan cu lo tin pa promove e profesion di docente na Aruba, y unda lo ta ideal pa traha e scolnan nobo.

Nos ta na altura cu a kita hopi di e incentivonan cu IPA tabata brinda na su candidatonan, pero awor mester busca un manera pa sea introduci nan di nobo of bin cu alternativanan atractivo p’esnan interesa den sigi cu nan estudio n’e instituto aki.
MEP lo duna su debido atencion tambe n’e fenomeno di studiantenan cu problema di comportacion.

Un studiante asina ta exigi hopi atencion for di un maestro, pero lamentablemente esaki ta bay hopi biaha na costo di e tempo cu otro studiantenan tin cu haya den e mesun klas.
Lo mester busca un solucion p’e problematica aki, unda e studiante cu problema di comportacion por haya e debido yudansa y e atencion cu e ta rekeri.
Pero tambe e otro studiantenan den klas no mester keda perhudica pa algun studiante cu tin problema di conducta.

Lo haci un estudio pa mira si tin e posibilidad di introduci scolnan dedica especialmente pa muchanan cu problema di conducta, segun Chris Romero (MEP).

Top