Parlamentario Clarisca Velasquez (AVP): Ata prueba cu MEP no sa yega reunion!

 

 

 

“Den un comunicado nos a tuma nota cu MEP a bin cu yen di mentiranan pa purba bisa cu MEP ta den tur reunion. Esaki ta un mentira flagrante, pasobra MEP no sa yega reunionnan y nan kiermen cu si un Parlamentario di MEP ta presente esey kiermen cu MEP ta presente.

Esaki no ta berdad!”, segun Parlamentario Velasquez.

 

“Eleccion 2013 a duna partido MEP 7 asiento pa nan por representa pueblo den parlamento y nan tur 7 mester t’ey presente den reunion publico cu wordo yama. E hendenan aki ta floho y incapacita y p’esey nan no ta yega reunion. A compila tur e lista di presencia durante ultimo lunanan di reunion publico p’asina nos pueblo por mira cu nan propio wowo cu MEP nunca ta completo den reunion publico. Ta solamente algun ta yega pa duna presencia.

Parlamentario di turno nan ta”, e Parlamentario a comenta.

 

“Tambe pueblo por subi nos website www.parlamento.aw y constata cu bo mes wowo cu e hendenan no sa yega reunion. E aña aki lo ta pio paso desesperacion pa yega poder ta pone cu ta campaña nan kier campaña en bes di yega trabao.

Mi ta kere ta boet di 500 florin mester introduci mescos cu e concepto cu Corsou kier bin cu ne pa tur esnan cu no ta yega trabao pa atende reunionnan publico. Tur hende ta siña ora nan sintie den nan cartera mi ta kere e ora MEP ta bay siña yega trabao.

Na mi opinion pueblo duna nan solamente 3 of 4 asiento den proximo eleccion, pasobra esey ta cifra di Parlamentarionan di MEP cu ta tene turno den Parlamento ora tin reunion publico”, Parlamentario Velasquez a duna di conoce.

Top