Parlamentario Clarisca Velasquez (AVP): Esaki ta e interes di MEP pa abuso sexual di menor

“Comision di Husticia a yama Minister di Husticia na Parlamento pa trece preocupacion di pueblo pa cu abuso sexual di menor un biaha mas. Henter Parlamento ta wordo invita pa e reunion aki y tur esnan cu no ta miembro di e comision tambe ta wordo invita pa atende e reunion aki mirando cu e ta un preocupacion den pueblo”, Parlamentario Velasquez ta splica.

 

“Nos a tuma nota cu Parlamentarionan di MEP a atende e manisfestacion dilanti Ministerio Publico rib’e preocupacion diamars ultimo cu nan derecho, pero awe diaranson cu ta nan deber pa atende e reunion importante aki aunke nan no ta miembro nan no a yega Parlamento.

Awor e pregunta cu ta surgi ta si e lider di MEP solamente ta busca pa saca probecho politico cu e preocupacion aki? Dicon e no a yega Parlamento diaranson ora Comision di Husticia a yama Minister di Husticia y Ministerio Publico pa sondea/brainstorm kico mas mester haci pa por preveni y combati e crimen aki contra nos menornan?”, e Parlamentario a cuestiona.

 

“Semper tur Parlamentario por atende tur reunion cu comisionnan ta yama na Parlamento y mirando cu abuso sexual di menornan ta un preocupacion grandi cu ta biba den pueblo.

Pero MEP solamente ta purba saca probecho politico, pasobra ora nan por contribui berdaderamente cu nan trabao pa yuda sondea kico mas por haci cu e crimen aki contra nos muchanan nan no ta presenta na trabao.

E ta mas cu obvio awor cu solamente dos miembro di MEP a presenta na e reunion aki cu Minister di Husticia y Ministerio Publico cu ta solamente probecho politico nan kier saca di e preocupacion grandi cu ta biba den nos comunidad”, Parlamentario Velasquez a conclui.

Top