Parlamentario Clarisca Velasquez (AVP): Gobierno mas transparente cu esaki no tabata existi

“E Gobierno aki ta e Gobierno cu a laga pueblo participa den su gobernacion pa medio di un dialogo social. Un dialogo caminda tur nos hendenan ta representa. Tur gremio a sinta na mesa unda decisionnan grandi a tuma lugar na bienestar di nos pais.

E Gobierno aki ta e Gobierno cu mas a scucha nos pueblo pa medio di su “townhall meetings” cu e ta organisa pa scucha sugerencia, preocupacion, idea y consehonan ora e ta pensa pa bin cu un proyecto, cambio y maneho. E Gobierno aki tin su portanan habri pa nos pueblo tur dia den siman y hasta diasabra pa esnan cu no por yega den siman”, segun Parlamentario Clarisca Velasquez.

 

“E Gobierno aki ta e Gobierno cu mas a mustra transpariencia cu su maneho di finanza introduciendo “jaarrekeningen” di cada aña presupuestario. For di aña 1986 ningun Gobierno no a haci esaki. E Gobierno aki a traha duro pa traha tur p’asina Aruba ta “up to date” cu su “jaarrekeningen” for di aña 1986 te cu e aña aki 2017. Esey kiermen cu e Gobierno aki a haci e trabao di transpariencia pa otro Gobiernonan tambe cu tabata t’ey prome cu ne.

E Gobierno aki ta prome Gobierno cu ta presenta su “jaarrekeningen” y su ” rapportages” di su finanza na Parlamento di Aruba. Esunnan cu ta bisa cu e Gobierno aki no ta transparente lo tabata na soño y/of ta bisa esaki pasobra no tin otro pieu pa piki pasobra e Gobierno cu nan mes a forma parti di dj’e tabata e Gobierno di mas intransparente cu tabatin.

Ni Centrale Accountant Dienst CAD por a drenta na departamentonan di Gobierno pa haci investigacion. No tabata existi dialogo cu ningun gremionan e temponan aya corda pa laga pueblo participa den gobernacion”, e Parlamentario di AVP ta comenta.

 

“Awe nos tin un Gobierno cu ta mas transparente posibel pa su pueblo. Cu tin cos pa mehora esey ta sigur pero no bin yena boca bisa cu no tin transpariencia pasobra esey ta un “flauw excuus” pa bay cera pacto cu diabel pa purba yega na poder.

E Gobierno aki a demostra transpariencia den tur cos cu e ta haci. Sigur tin cos pa mehora esey ta sigur y esaki ta un proceso cu e Gobierno aki a bin ta sigui di tempo cu el a asumi su responsabilidad na aña 2009. Prome cu aña 2009 no tabatin transpariencia at all den gobernacion di Aruba”, Parlamentario Clarisca Velasquez ta conclui.

Top