Parlamentario Clarisca Velasquez (AVP): Kico ta haci un hende lider?

“Liderazgo ta ora un lider ta inspira otro dor di ta un ehempel. Un lider tin un vision cu ta mara na principionan y balornan cu e ta pasa pa otronan. Banda di esakinan su vision, principionan y balornan den bienestar di metanan comun cu un sociedad tin.

Lidernan di berdad ta wordo sigui a base di nan autoridad moral y hendenan ta sinti nan mes identifica cu e vision, principionan y balornan cu e lider ta resalta y ta para p’e.

Hendenan no ta solamente kere den loke e lider ta haci, pero pakico e ta haci algo. Si e lider ta autentico den loke e ta haci”, Parlamentario Velasquez a bisa.

 

“Nos sa di casonan di lidernan cu a percura pa logra nan propio meta y no esun comun cu ta enrikecemento personal of di famia y esaki no ta propio di un lider di berdad.

Esakinan ta casonan di hendenan cu a wordo imponi como lider y esakinan ta e consecuencia e ora. Un lider di berdad ta subordina su mes na e meta comun…e bienestar general.

Un lider cu no tin autoridad moral no ta un bon lider cu tin su principio y balornan bon defini. No ta resalta tampoco su integridad e ora. Al contrario, e ta pone su integridad na duda.

Y loke e ta haci ta purba pone den duda integridad di otronan p’asina e “limpia” (verschoon) su mes di e cosnan cu e a keda keto, tolera of haci nada p’asina stop su famia di por a enrikece nan mes riba cuenta di Gobierno (lesa Pueblo)”, e Parlamentario a expresa.

 

“Manera Gandhi a bisa “sea bo mes e cambio cu bo kier mira den e mundo”. Pa cuminsa na desaroya y bira un bon lider mester cuminsa na pone e bienestar comun (general) na prome luga, pone bo mes bou di e loep critico y puntra bo mes si bo ta e lider cu lo bo kier ta, si bo tin bo ego bou control, si bo ta suficiente disciplina pa duna contenido real na bo idealnan. Y no manera otro supuesto lidernan cu ta lider solamente pa enrikece su famia”, tabata palabranan di Parlamentario Velasquez.

Top