Parlamentario Clarisca Velasquez (AVP): MEP no por ni traha cuentanan anual di nan fraccion anto nan kier goberna e pais aki

“Fraccion di MEP tin fractiemedewerker desde aña 2010 y na fin di cada aña nan mester entrega cuenta anual “jaarrekening” pa mustra kico a haci cu e suma presupuesta. Te dia di awe nunca nan no a entrega cuentanan anual anto e hendenan aki kier goberna e pais aki.

Un berguensa esaki ta. Hendenan cu tur ora kier critica riba delaster un cos y nan mes no por traha ni un cuenta anual di nan fraccion”, segun Parlamentario Clarisca Velasquez.

 

“Pueblo mester sa e cosnan aki pasobra e lider kier saca wowo di tur departamento pa cuenta anual y e mes no ta percura pa traha cuenta anual di su fraccion di MEP.

E hendenan aki kier manipula e pueblo aki cu yen di promesa y bisa cu MEP ta e alternativa pa proximo eleccion, pero loke nan no ta bisa ta cu MEP mes no por entrega te dia di awe nan mes cuentanan anual for di aña 2010 na Parlamento di Aruba”, e Parlamentario a splica.

 

“MEP ta un farsa total y ta kere pueblo no ta haya sa nan bagamunderianan. MEP no ta e alternativa pa e pais aki. E hendenan aki ta negativo y destructivo. Nos pais ta bayendo den bon rumbo na man di nos Gobierno cu hopi desaroyo, economia riba bon pia y finanza cu solamente 0.5 % di deficit. Miho MEP cuminsa yega Staten pa traha maske ta asina nan por siña haci nan trabao mas miho den oposicion, pasobra eynan nan ta bay keda sinta pa e proximo 4 añanan”, Parlamentario Velasquez a continua bisando.

 

“Tambe un mensahe na MEP pa cuminsa traha nan cuentanan anual y entrega nan na Parlamento. Si nan no por pasa wak e cuentanan anual di fraccion di AVP pa nan por siña con ta trah’e, pasobra fraccion di AVP si a traha tur di dj’e y entreg’e tambe. E flohonan y incapacita cu nan ta ni cuentanan anual nan no por traha. Increibel om!”, Parlamentario Clarisca Velasquez a conclui.

Top