Parlamentario Clarisca Velasquez (AVP): Nos fondonan di pensioen ta stabil pa decada nan cu ta bin

“Nos Gobierno a tuma su responsabilidad na serio y a cumpli cu su trabao di salba e fondonan di pensioen. Hopi Gobierno a laga di haci esaki y a laga e batata cayente aki pa otro Gobierno. Hasta e lider di MEP cu na aña 2002 tabata trahando como profesional na belasting a conseha su mes Gobierno cu mester hisa e edad di pensioen. Awe kier haci politikeria cu e tema aki”, segun Parlamentario Clarisca Velasquez.

 

“E reformanan structural cu Gobierno a bin ta haci cu e fondonan AOV, APFA y AZV a haci cu awe e fondonan aki ta stabil y sostenibel pa añanan cu ta bin. For di aña 2010 a aproba leynan pa haci e reformanan aki posibel. Awe nos ta orguyoso di nos fondonan y hasta IMF a felicita Gobierno pa e ehercicionan haci pa cu e fondonan”, e Parlamentario a remarca.

 

“Si nos wak nos hermana islanan, nan ta confronta cu problemanan grandi cu nan fondonan di pensioen. Na Corsou a hisa nan edad di pensioen dibiaha na 65 aña. Y si bo kier bay pensioen prome bo ta haya menos placa na pensioen.

Na Bonaire tambe tin problema cu kier reduci pensioen di grandinan cu 3% e aña aki y otro aña cu 12%. Esaki ta nifica cu e pensionadonan ta bay haya cobra menos placa na pensioen”, el a continua bisando.

 

“E problemanan aki nos no tin na Aruba pasobra Gobierno aki a salba e fondonan di pensioen y AZV. Nos fondo ta stabil y sostenibel pa decadanan cu ta bin y esaki ta danki na curashi cu e Gobierno a tuma for di aña 2010 trahando riba reformanan pa medio di ley pa haci esaki posibel”, Parlamentario Velasquez a conclui.

Top