Parlamentario Clarisca Velasquez (AVP): Savaneta ta e districto cu mas a beneficia di proyecto Green Corridor

Infrastructura di un pais ta hopi esencial pasobra e ta mustra con desaroya un pais ta pa medio di su infrastructura. Ademas di esaki, e ta hisa calidad di bida di e habitantenan. E fluho di trafico ta bay mas lihe di manera cu e hende por yega su cas mas lihe pa ta cu su famia.

Un bon infrastructura ta percura pa mas seguridad den trafico, segun Parlamentario Clarisca Velasquez.

 

Tambe un bon infrastructura ta stimula mas perspectiva pa diversificacion di economia.

E districto di Savaneta ta e districto cu mas ta beneficia di e proyecto di Green Corridor, pasobra e ta pasa rib’e tres adernan mas importante bayendo Sanicolas y viceversa pa Oranjestad.

E tres camindanan mas grandi cu ta pasa den Savaneta ta haya desaroyo di Green Corridor.

E parti memey cu ta e caminda principal di Sanicolas pa Oranjestad, e caminda cu ta core bandi pazuid bandi lama cu a haya pida nobo cu por yega te Mariniers Kazerne pa por bay San Nicolas y vice versa pa Oranjestad y tambe e caminda cu ta pasa panort di Savaneta cu t’e parti cu ta pasa riba Yaraweg, Sero Alejandro, Rooi Kochi, Mabon, Brazil bay te San Nicolas.

Savaneta a conoce un infrastructura masha bunita cu ademas ta hisa calidad di bida di Savaneteronan. Nunca antes un Gobierno a yega di duna tanto atencion na e districto di Savaneta cu e Gobierno aki, e Parlamentario ta splica.

 

Ademas di traha un bunita infrastructura pa Savaneta, caminda e Savaneteronan cu ta biba na altura di e caminda memey a haya klinker dilanti nan cas, a traha un MFA pa Savaneta caminda ta bay duna tur servicio den e edificio aki di Gobierno y tambe priva, a drecha speelplaats cu asfalt nobo di nos scolnan basico di nos districtonan caminda pa mas di 30 aña no a haya un drecha, a traha pier nobo na unda antes Brisas del Mar caminda nos por disfruta di e lama atrobe manera tempo nos tabata chikito.

Savaneteronan ta contento cu e desaroyo grandi cu nos districto a haya y ora e proyecto di Green Corridor keda cla Savaneta lo ta mas bunita ainda pasobra ainda falta!!!, Parlamentario Velasquez ta termina.

Top