Parlamentario Clarisca Velasquez: Encuentro den Parlamento a duna hopi informacion rib’e fenomeno di atraco cu ta azotando nos isla

“Dialuna ultimo, fraccion di AVP a pidi un encuentro p’asina Minister di Husticia bin Parlamento duna cuenta riba con ta preveni y combati e fenomeno di atraconan di ultimo lunanan riba nos isla.

Nos tur ta hopi preocupa cu e situacion y nos a bin cu preguntanan hopi critico pa nos Minister mirando cu nos kier mira accionnan efectivo y di biaha pa combati e fenomeno di atraco aki.

Polisnan cu tabata presente a duna un presentacion rib’e ultimo investigacion y tendencianan riba atraconan di aña 2016 y 2017”, Parlamentario Velasquez a splica.

 

“Nos tin cu remarca cu medionan di comunicacion mester ta cauteloso ora ta publica den nan media pa no ta sensacionalista rib’e preocupacion aki di atraco pasobra por daña nomber di Aruba internationalmente y por sembra panico den nos comunidad.

Nos tur ta consciente cu tin un fenomeno di atraco riba nos isla, pero no cu nos isla ta manera Jamaica p. e. Esey mester ta cla den esaki. A haya informacion for di Polis cu te awo januari 2017 a registra 12 atraco y februari 2 atraco. Aña pasa 2016 tabatin un cantidad di mas Arubianonan (20) cu a comete atraconan na Aruba, despues a sigui pa Venezolanonan (14), Curasoleñonan (2), Dominicanonan (1) y Colombianonan (1). Esaki a shift den e aña aki di 2017 pa mas tanto Venezolanonan”, e Parlamentario a continua bisando.

 

“Aña pasa, e atraconan a tuma luga mas tanto den districtonan Noord, San Nicolas y Sta. Cruz. Den pasado Cuerpo Policial a confronta nan mes cu atracadornan profesional cu ta bin dal negoshinan, esaki a shift pa atraconan den casnan di bario y riba individuonan riba caya.

E tendencia ta atraco di impulse, dus bay rapido y sali rapido bek. Lo ta bon pa ciudadanonan tene cuenta cu e atracadornan aki no tin miedo di wordo reconoci.

Nan ta habla Spaño, nan ta comete e atraco sin cara tapa y nan ta satisfecho cu loke nan encontra. Esey kiermen nan ta drenta e cas exigi apuntando e arma tur loke tin di balor y nan ta sali bay.

E identidad di e Venezolanonan aki ta hopi biaha dificil pa “traceer” ya cu nan ta drenta y sali rapido di Aruba y e “pakkans” e chens pa garanan ta bira un reto grandi pa Polis”, Parlamentario Velasquez a duna di conoce.

 

“E mas tristo ta cu nos propio localnan ta e facilitador di e atracadornan. Nos propio hendenan ta cuminsa pa para garantia pa e Venezolanonan, nos propio hendenan ta duna e Venezolanonan aki dak riba nan cabes, informacion y transporte y esaki ta di lamenta.

E Venezolanonan no por haci nada na Aruba si no tin hende ta yudanan. Y mester recorda cu complicidad ta castigabel pa ley. Peso di ley mester baha pisa riba nos hendenan cu ta yuda/facilita e atracadornan aki comete nan fechoria riba nos isla”, Parlamentario Velasquez a conclui.

Top