Parlamentario Clarisca Velasquez: Fraccion di AVP durante dos periodo a marca historia di bon trabao den Parlamento

E di 8 y 9 Parlamento, fraccion di AVP a marca historia den Parlamento pa su trabao desplega. No tabatin un fraccion mas critico riba Gobierno cu fraccion di AVP.

Ora leynan a yega Parlamento pa trata fraccion di AVP a sinta cu tur instancia cu tin di haber cu e ley den su ehecucion pa mehora e ley y den mayoria caso a trece cambionan den amienda durante tratamento di e leynan.

 

Segun Clarisca Velasquez, fraccion di AVP t’e fraccion cu mas amienda a presenta durante tur dos periodo den Parlamento. Fraccion di AVP cu tur su experticio riba diferente tereno a sa di aproba leynan na bienestar di nos pais p’asina Gobierno tin instrumentonan pa por ehecuta proyectonan tur na bienestar di nos hendenan.

Awe pueblo por wak cu su mes wowo tur e proyectonan. Awe nos pais ta riba bon rumbo den tur sentido. Nos economia ta riba e rumbo positivo.

 

Nos finanza ta sostenibel pa futuro cu leynan cu ta sostene esaki, nos turismo tambe ta sostenibel cu leynan pa haci esaki posibel, nos infrastructura ta casi drecha completamente cu leynan pa por a ehecuta esakinan.

Nos pais ainda ta goza di seguridad cu hopi ley a haci posibel cu husticia por preveni y combati criminalidad mas efectivo y nos ta mira e frutanan.

 

Si tin cu constata aki aya propio hendenan cu ta daña nos pais su nomber dor di bay comete ladronicia arma riba hende y politiconan cu ta contribui na sembra panico intencionalmente dañando asina nomber di nos pais.

Tambe e problema na pais bisiña cu ta bin hendenan aki pa comete actonan castigabel cu yudansa di nos propio hendenan.

 

Segun Clarisca Velasquez, fraccion di AVP semper a sali na vanguardia di bienestar di nos comunidad aprobando tur presupuesto y leynan cu awe tur hende por mira con Aruba ta progresando den tur aspecto.

Top